Uttam Kumar: కాళేశ్వరం ప్రాజెక్టుపై మంత్రి ఉత్తమ్ కుమార్ రెడ్డి చేసిన కీలక వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి. సోమవారం జరిగిన తెలంగాణ కేబినెట్ సమావేశానంతరం మీడియాతో మాట్లాడిన ఆయన, గత ప్రభుత్వ హయాంలో జరిగిన అవకతవకలపై ఘాటుగా స్పందించారు.
ప్రాజెక్టు డిజైన్‌ను కేసీఆర్ మార్చారు
ఉత్తమ్ కుమార్ రెడ్డి వ్యాఖ్యానిస్తూ, “తుమ్మడిహట్టి దగ్గర బ్యారేజ్ నిర్మించాలని ప్రాథమికంగా నిర్ణయించబడింది. ₹38 వేల కోట్లతో 16 లక్షల ఎకరాలకు నీరు అందించేలా ప్రాజెక్టును డిజైన్ చేశారు. కానీ కేసీఆర్ ముఖ్యమంత్రిగా అధికారంలోకి వచ్చిన తర్వాత, ప్రాజెక్టు డిజైన్‌ను తన ఇష్టానుసారంగా మార్చారు” అని ఆరోపించారు.
వడ్డీలకు ముంచిన రుణాలు
అత్యధిక వడ్డీతో NBFCల నుంచి రూ.84 వేల కోట్లు రుణాలుగా తీసుకున్న విషయాన్ని కూడా ఆయన ఎత్తిచూపారు. “ఈ రుణాల లావాదేవీల్లో భారీ అవకతవకలు జరిగాయి. ప్రజాధనం దుర్వినియోగమైంది” అని అన్నారు.
విచారణ కమిషన్ నివేదిక
ఎన్నికల సమయంలో ప్రజలకు ఇచ్చిన హామీ మేరకు కాళేశ్వరం ప్రాజెక్టుపై విచారణకు ఆదేశించామని తెలిపారు. రాజకీయ పక్షపాతం లేకుండా పీసీ ఘోష్ కమిషన్ వేసినట్లు చెప్పారు.
కమిషన్ మొత్తం 605 పేజీల నివేదికను సమర్పించిందని,
ఆ నివేదికను అధ్యయనం చేయడానికి మూడు సభ్యుల అధికారుల కమిటీ ఏర్పాటు చేసినట్లు తెలిపారు.
వారు నివేదికను 25 పేజీలకు సంక్షిప్తం చేసి ఇచ్చారని పేర్కొన్నారు.
మేడిగడ్డ లోపాలపై NDSA వ్యాఖ్య
“మేడిగడ్డ బ్యారేజీలో నిర్మాణ లోపాలు ఉన్నాయని నేషనల్ డ్యామ్ సేఫ్టీ అథారిటీ (NDSA) స్పష్టం చేసింది. ఈ బ్యారేజీ తాము అధికారంలోకి రాకముందే కుంగిపోయింది” అని చెప్పారు.
ప్రభుత్వం కట్టుదిట్టమైన చర్యలు తీసుకుంటుంది
ఈ నివేదికల వెలుగులో ప్రభుత్వం తగిన చర్యలు తీసుకుంటుందని మంత్రి స్పష్టం చేశారు. “ఇది రాజకీయ ప్రతీకారంగా కాదు. ప్రజాధనానికి సమర్ధనగా తీసుకుంటున్న నిర్ణయాలు మాత్రమే” అని పేర్కొన్నారు.