ISL 2024-25: ముంబై..ఇండియన్ సూపర్ లీగ్ (ఐఎస్ఎల్) హైదరాబాద్ ఫుట్బాల్ క్లబ్ పరాజయాల పరంపర కొనసాగుతోంది. లీగ్ లో భాగంగా శనివారం జరిగిన పోరులో హైదరాబాద్ జట్టు 0-1 గోల్ తేడాతో ముంబై సిటీ ఫుట్బాల్ క్లబ్ చేతిలో ఓటమి పాలైంది. ముంబై జట్టు తరఫున మెహతాబ్ సింగ్ (29వ నిమిషంలో) ఏకైక గోల్ చేశాడు. మ్యాచ్లో ముంబై జట్టు హైదరాబాద్ గోల్ పోస్పై 4 షాట్లు బాదగా… అందులో ఒకటి లక్ష్యాన్ని చేరింది.
హైదరాబాద్ మూడు ప్రయత్నాలు చేసినా ఖాతా తెరవలేకపోయింది. 55 శాతం బంతిని తమ ఆ«దీనంలో ఉంచుకున్న ముంబై చివరకు విజేతగా నిలిచింది. తాజా సీజన్లో 9 మ్యాచాడిన హైదరాబాద్ జట్టు 2 విజయాలు, ఒక ‘డ్రా’, 6 పరాజయాలతో 7 పాయింట్లు ఖాతాలో వేసుకొని పట్టికలో 11వ స్థానంలో ఉండగా… ముంబై జట్టు 9 మ్యాచ్లో 3 విజయాలు, 4 ‘డ్రా’లు, 2 పరాజయాలతో 13 పాయింట్లు సాధించి పట్టికలో ఆరో స్థానంలో కొనసాగుతోంది.
ఇది కూడా చదవండి: PV Sindhu: సింధు ఎట్టకేలకు
ISL 2024-25: శనివారమే జరిగిన మరో మ్యాచ్లో మోహన్ బగాన్ జట్టు 1-0 గోల్స్ తేడాతో చెన్నైయిన్ ఫుట్బాల్ క్లబ్పై గెలుపొందింది. మోహన్ బగాన్ తరఫున జాసన్ కమింగ్స్ (86వ నిమిషంలో) ఏకైక గోల్ సాధించాడు. ఆడిన 9 మ్యాచ్లో ఆరో విజయం ఖాతాలో వేసుకున్న మోహన్ బగాన్ జట్టు 20 పాయింట్లతో పట్టిక అగ్ర స్థానంలో నిలిచింది. ఆదివారం ఒడిశా జట్టుతో బెంగళూరు ఫుట్బాల్ క్లబ్ తలపడనుండగా… హైదరాబాద్ తమ తదుపరి మ్యాచ్ను బుధవారం గోవా ఫుట్బాల్ క్లబ్తో ఆడనుంది.