Jayashankar Bhupalpally: ఇసుక రావణ చేస్తుండగా.. ప్రమాదం ఆ తర్వాత ఏమైంది అంటే!

Jayashankar Bhupalpally: ఇందిరమ్మ ఇళ్ల నిర్మాణం కోసం ఇసుకను తరలిస్తున్న ట్రాక్టర్ డ్రైవర్లు ఊహించని ప్రమాదంలో చిక్కుకున్నారు. ఎగువన కురిసిన భారీ వర్షాల కారణంగా మానేరు వాగు ఒక్కసారిగా ఉప్పొంగడంతో ఈ ప్రమాదం జరిగింది. ఈ ఘటన శుక్రవారం నాడు టేకుమట్ల మండలం, గర్మిళపల్లి-ఓడేడు గ్రామాల మధ్య చోటుచేసుకుంది.

ఒక్కసారిగా పెరిగిన వాగు ప్రవాహం
శుక్రవారం ఉదయం ఇందిరమ్మ ఇళ్ల నిర్మాణం కోసం మొత్తం 11 ట్రాక్టర్లు మానేరు వాగులోకి ఇసుక కోసం వెళ్లాయి. ట్రాక్టర్ డ్రైవర్లు ఇసుక నింపుకుంటున్న సమయంలో అకస్మాత్తుగా వాగులో నీటి ప్రవాహం భారీగా పెరిగింది. వాగు మధ్యలో చిక్కుకున్న ట్రాక్టర్లను బయటకు తీయడం అసాధ్యంగా మారింది.

ట్రాక్టర్లపైకి ఎక్కి ఆర్తనాదాలు
ఇసుక నింపుకున్న ఐదు ట్రాక్టర్లు వాగును దాటేందుకు ప్రయత్నించాయి. అయితే, వరద ఉధృతి ఎక్కువ కావడంతో ట్రాక్టర్లు మధ్యలోనే మునిగిపోయాయి. ఈ ప్రమాదంలో ట్రాక్టర్ ట్రాలీలు బోల్తా పడ్డాయి. ప్రాణభయంతో డ్రైవర్లు ట్రాక్టర్ల పైకి ఎక్కి సహాయం కోసం కేకలు వేశారు. వారి ఆర్తనాదాలు విన్న స్థానికులు వెంటనే పోలీసులకు సమాచారం అందించారు.

అప్రమత్తంగా వ్యవహరించిన పోలీసులు, స్థానికులు
సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. పోలీసులు మరియు స్థానికుల సహాయంతో తాడుల సహాయంతో డ్రైవర్లను సురక్షితంగా ఒడ్డుకు చేర్చారు. దీంతో పెను ప్రమాదం తప్పి, ప్రాణనష్టం జరగకుండా నివారించారు.

అయితే, మొత్తం ఎనిమిది ట్రాక్టర్లు వాగులో మునిగిపోయినట్లు తెలుస్తోంది. మునిగిపోయిన ట్రాక్టర్లను బయటకు తీసేందుకు సహాయక చర్యలు కొనసాగుతున్నాయి. ఈ ప్రమాదంతో ఆ ప్రాంతంలో ఒక్కసారిగా తీవ్ర ఉద్రిక్తత నెలకొంది.