Stalin: తమిళనాడు ముఖ్యమంత్రి ఎంకే స్టాలిన్ నివాసానికి బాంబు పెట్టినట్లు వచ్చిన బెదిరింపు కాల్ రాష్ట్రవ్యాప్తంగా సంచలనం రేపింది. అయితే, పోలీసుల గట్టి తనిఖీల తర్వాత ఇది తప్పుడు బెదిరింపు కాల్‌గా నిర్ధారణ అయింది. దీనితో ప్రజలు ఊపిరి పీల్చుకున్నారు.
ఆదివారం ఉదయం, చెన్నైలోని పోలీసు కంట్రోల్ రూమ్‌కు ఓ గుర్తు తెలియని వ్యక్తి ఫోన్ చేసి, సీఎం స్టాలిన్ నివాసంలో బాంబు పెట్టినట్లు తెలిపాడు. స్టాలిన్ నివాసం చెన్నై నగరంలోని అల్వార్‌పేట ప్రాంతంలో ఉంది. ఈ సమాచారంతో వెంటనే పోలీసులు అప్రమత్తమయ్యారు.
చెన్నై పోలీసులు, బాంబ్ డిస్పోజల్ స్క్వాడ్, స్నిఫర్ డాగ్స్ సహా ప్రత్యేక బృందాలు సీఎం నివాసానికి చేరుకుని అణువణువు తనిఖీ చేశారు. నివాసం లోపలే కాకుండా, చుట్టుపక్కల ప్రాంతాల్లోనూ భద్రతను బలపరిచారు. సుమారు ఒక గంటన్నర పాటు బృందాలు విస్తృతంగా తనిఖీలు నిర్వహించాయి.
తదుపరి తనిఖీల్లో ఎలాంటి పేలుడు పదార్థాలు లేదా అనుమానాస్పద వస్తువులు లభ్యం కాలేదని అధికారులు వెల్లడించారు. ఇది కేవలం నకిలీ బెదిరింపు కాల్ అని స్పష్టం చేశారు. బెదిరింపు అనంతరం ఏర్పడిన ఉత్కంఠ కొంతకాలం తర్వాత తీరింది.
ఇప్పటికే ఈ తప్పుడు కాల్‌కు సంబంధించి పోలీసులు దర్యాప్తు ప్రారంభించారని, కాల్ వచ్చిన నంబర్‌ను ఆధారంగా పెట్టుకుని ఆ వ్యక్తిని గుర్తించే పనిలో ఉన్నారు. నిందితుడిపై కఠిన చర్యలు తీసుకోనున్నట్లు సమాచారం.
గమనించదగ్గ విషయం ఏమిటంటే, ఇటీవలే తమిళగ వెట్రి కజగం (టీవీకే) అధినేత, సినీ నటుడు విజయ్ నివాసానికీ ఇలాంటి బెదిరింపు కాల్ వచ్చినట్లు పోలీసులు తెలిపారు. ఆ కాల్ కూడా తప్పుడు బెదిరింపుగా తేలింది. రెండు సంఘటనల మధ్య ఏమైనా సంబంధముందా? అనే కోణంలోనూ పోలీసులు విచారణ చేస్తున్నారు.