Satya Kumar: అనకాప‌ల్లి ఎన్టీఆర్ ప్రభుత్వాసుపత్రిలో 2020లో చోటుచేసుకున్న నిర్వాహక లోపాలపై రాష్ట్ర ఆరోగ్య మంత్రి సత్యకుమార్ యాదవ్‌ కఠినంగా స్పందించారు. ఈ అవినీతికి సంబంధించి 22 మంది డాక్టర్లు, నర్సులపై తక్షణ విచారణ చేపట్టాలని అధికారులను ఆదేశించారు.
ఫిబ్రవరి 2020లో ఏసీబీ అధికారులు నిర్వహించిన ఆక‌స్మిక తనిఖీల్లో అనేక అక్రమాలు వెలుగుచూశాయి. గడచిన జూన్‌లో అందిన ఏసీబీ నివేదికను పరిశీలించిన మంత్రి, అవినీతి, పాలనాపరమైన వైఫల్యాలు, పర్యవేక్షణ లోపాలను తీవ్రంగా పరిగణలోకి తీసుకున్నారు.
నివేదిక ప్రకారం, ఇన్‌పేషెంట్ల లెక్కల్లో తేడాలు, మందుల వినియోగంపై సరైన నమోదు లేకపోవడం, నర్సుల నిర్లక్ష్యం వంటి అంశాలు బహిర్గతమయ్యాయి. దీనికి తోడు, గత ప్రభుత్వ హయాంలో కొనసాగిన అవ్యవస్థితిని ఈ నివేదిక కచ్చితంగా చాటిచెప్పింది.
డిసిహెచ్‌ఎస్‌తో పాటు మరో తొమ్మిది మంది వైద్యులు, 12 మంది హెడ్ నర్సులు మరియు స్టాఫ్ నర్సులపై విచారణకు అధికారులను నియమించేందుకు ఆదేశించారు. అంతేగాక, మంత్రి తరచుగా సమీక్షలు నిర్వహిస్తున్న నేపథ్యంలో అధికార యంత్రాంగంలో మార్పులు స్పష్టంగా కనిపిస్తున్నాయి.
అక్రమాలను అరికట్టే క్రమంలో, ఇటీవల సాధారణ బదిలీల్లో పలు జూనియర్, సీనియర్ అసిస్టెంట్లు, ఆఫీస్ సూపరింటెండెంట్లు, అకౌంటెంట్లను ఇతర కార్యాలయాలకు బదిలీ చేశారు. అలాగే, ఆసుపత్రుల సూపరింటెండెంట్లు, వైద్య కళాశాలల ప్రిన్సిపాళ్లను ప్రతిభ ఆధారంగా ఎంపిక చేసి నియమించే చర్యలు తీసుకుంటున్నారు.
ఏసీబీ నివేదికను దృష్టిలో ఉంచుకుని, ప్రభుత్వాసుపత్రుల్లో పటిష్టమైన పరిపాలన స్థాపించేందుకు కఠిన చర్యలు తీసుకోవాలని మంత్రి ఆదేశించారు.