Charlie Kirk: అమెరికా అధ్యక్షుడు డోనాల్డ్ ట్రంప్‌కు అత్యంత సన్నిహితుడైన యువ కన్జర్వేటివ్ యాక్టివిస్ట్ చార్లీ కిర్క్ (31) ఓ దారుణ ఘటనలో ప్రాణాలు కోల్పోయారు. ఉటా వ్యాలీ యూనివర్సిటీలో జరుగుతున్న ఒక సదస్సులో ఆయన ప్రసంగిస్తుండగా, ఓ దుండగుడు కాల్పులు జరిపాడు. ఈ దాడిలో తీవ్రంగా గాయపడిన కిర్క్‌ను వెంటనే ఆసుపత్రికి తరలించారు. కానీ, చికిత్స పొందుతూ ఆయన మరణించారు. ఈ ఘటన యావత్ అమెరికాలో కలకలం సృష్టించింది.
చార్లీ కిర్క్ మరణంపై డోనాల్డ్ ట్రంప్ తీవ్ర దిగ్భ్రాంతి వ్యక్తం చేశారు. కిర్క్ ఒక గొప్ప వ్యక్తి అని, అమెరికా యువత ఆలోచనలను ఆయన కంటే బాగా అర్థం చేసుకున్న వారు మరొకరు లేరని ట్రంప్ తన సోషల్ మీడియాలో పేర్కొన్నారు. కిర్క్ మృతికి సంతాప సూచికగా జాతీయ జెండాను అవనతం చేయాలని పిలుపునిచ్చారు. ఈ హత్య కేసులో నిందితుడిని పోలీసులు అదుపులోకి తీసుకున్నారు. ఈ దాడిపై దర్యాప్తు జరుగుతున్నట్లు ఎఫ్‌బిఐ డైరెక్టర్ కాష్ పటేల్ తెలిపారు.
అమెరికాలో సామూహిక కాల్పుల (మాస్ షూటింగ్‌)పై జరుగుతున్న ఒక చర్చా కార్యక్రమంలో చార్లీ కిర్క్ పాల్గొన్నారు. ఒక టెంట్ కింద కూర్చుని, విద్యార్థులు అడుగుతున్న ప్రశ్నలకు ఆయన సమాధానాలు ఇస్తున్నారు. అదే సమయంలో, ఒక గుర్తుతెలియని వ్యక్తి కిర్క్ మెడపై కాల్చడం ఓ వైరల్ వీడియోలో స్పష్టంగా కనిపిస్తోంది. ఈ ఘటనతో అక్కడున్న వారంతా భయంతో పరుగులు తీశారు.
Also Read: Narendra Modi: దోహాలో ఇజ్రాయెల్ దాడులపై మోడీ తీవ్ర స్పందన
ఈ కార్యక్రమానికి ముందు కూడా చార్లీ కిర్క్ పర్యటనపై యూనివర్సిటీలో తీవ్ర వ్యతిరేకత వ్యక్తమైంది. ఆయన ప్రసంగాన్ని రద్దు చేయాలని కోరుతూ దాదాపు 1000 మంది విద్యార్థుల సంతకాలతో కూడిన ఒక వినతి పత్రం యూనివర్సిటీ యాజమాన్యానికి అందింది. అయితే, భావప్రకటన స్వేచ్ఛకు తమ యూనివర్సిటీ మద్దతు ఇస్తుందని పేర్కొంటూ, కార్యక్రమాన్ని రద్దు చేయడానికి యాజమాన్యం నిరాకరించింది.
చార్లీ కిర్క్ కేవలం 18 సంవత్సరాల వయసులోనే ‘టర్నింగ్ పాయింట్ యూఎస్ఏ’ అనే యువజన సంస్థను స్థాపించారు. ఈ సంస్థ ద్వారా ఆయన యువతలో కన్జర్వేటివ్ భావాలను ప్రోత్సహించారు. డొనాల్డ్ ట్రంప్ అధ్యక్షుడిగా ఉన్న సమయంలో ఆయనకు అత్యంత ముఖ్యమైన మద్దతుదారులలో కిర్క్ ఒకరు. ట్రంప్ కుటుంబానికి కూడా ఆయన చాలా సన్నిహితుడు.
ఈ హత్య ఘటన దేశవ్యాప్తంగా రాజకీయ, సామాజిక వర్గాలలో తీవ్ర చర్చకు దారితీసింది. రాజకీయ భేదాభిప్రాయాలు హింసకు దారి తీయడంపై చాలామంది ఆందోళన వ్యక్తం చేస్తున్నారు. పూర్తి వివరాలు ఎఫ్‌బిఐ దర్యాప్తు తర్వాత వెలువడనున్నాయి.
The shot was so accurate, not possible for a Random left activist…
pic.twitter.com/IZTAkZM02Y— Mr Sinha (@MrSinha_) September 11, 2025