Sikh Woman In London: యునైటెడ్ కింగ్‌డమ్‌లో భారత సంతతి ప్రజలపై జాత్యాహంకార దాడులు ఆందోళన కలిగిస్తున్నాయి. తాజాగా ఓల్డ్‌బరీ పట్టణంలో ఓ 20 ఏళ్ల సిక్కు యువతిపై ఇద్దరు శ్వేతజాతీయులు లైంగిక దాడికి పాల్పడి, జాత్యాహంకార వ్యాఖ్యలతో దూషించిన ఘటన సంచలనంగా మారింది. ఈ సంఘటన స్థానిక సిక్కు సమాజంలో తీవ్ర ఆగ్రహాన్ని రేకెత్తించింది.
ఘటన వివరాలు
గత మంగళవారం ఉదయం 8.30 గంటల సమయంలో టేమ్ రోడ్ సమీపంలో ఈ అమానుష దాడి జరిగింది. ఒంటరిగా వెళ్తున్న యువతిపై ఇద్దరు దుండగులు దాడి చేసి అత్యాచారానికి పాల్పడ్డారు. అంతటితో ఆగకుండా, “మీ దేశానికి తిరిగి వెళ్లిపో” అంటూ అవమానకరమైన జాత్యహంకార వ్యాఖ్యలు చేశారు. బాధితురాలి ఫిర్యాదు మేరకు కేసు నమోదు చేసిన పోలీసులు, దీనిని *‘జాతి వివక్షతో కూడిన నేరం’*గా పరిగణిస్తున్నట్లు వెల్లడించారు.
నిందితుల కోసం గాలింపు
పోలీసుల సమాచారం ప్రకారం, నిందితులిద్దరూ శ్వేతజాతీయులే. వారిలో ఒకరు గుండుతో, ముదురు రంగు స్వెట్‌షర్ట్ ధరించి ఉండగా, మరొకరు బూడిద రంగు టాప్ వేసుకున్నారని బాధితురాలు తెలిపింది. సీసీటీవీ ఫుటేజ్, ఫోరెన్సిక్ ఆధారాలను పరిశీలిస్తూ నిందితుల కోసం గాలింపు చేపట్టినట్లు తెలిపారు. ప్రజలు సహకరించాలని కూడా విజ్ఞప్తి చేశారు. స్థానిక సమాజంలో ఆందోళన దృష్ట్యా గస్తీ బలగాలను పెంచుతున్నామని సీనియర్ అధికారి హామీ ఇచ్చారు.
ఇది కూడా చదవండి: Mahaa Vamsi: సజ్జల అద్భుత అబద్ధం..బాగోతం బయటపెట్టిన మహా వంశీ..!
తీవ్ర ఖండన
ఈ ఘటనపై బ్రిటన్ పార్లమెంట్ సభ్యులు తీవ్రంగా స్పందించారు.
బర్మింగ్‌హామ్ ఎడ్జ్‌బాస్టన్ ఎంపీ ప్రీత్ కౌర్ గిల్ మాట్లాడుతూ, “ఇది అత్యంత హేయమైన చర్య. ‘మీరు ఈ దేశానికి చెందిన వారు కాదు’ అని బాధితురాలిని అవమానించడం దారుణం. కానీ ఆమె ఇక్కడికే చెందినవారు. ప్రతి సమాజానికి గౌరవంగా, సురక్షితంగా జీవించే హక్కు ఉంది” అని పేర్కొన్నారు.
మరో ఎంపీ జస్ అత్వాల్ మాట్లాడుతూ, “దేశంలో పెరుగుతున్న జాతి వివక్ష ఉద్రిక్తతల ఫలితమే ఈ దాడి. ఒక యువతి జీవితాంతం మానసిక వేదన అనుభవించాల్సి వస్తోంది” అని ఆవేదన వ్యక్తం చేశారు.
వరుస దాడులు ఆందోళనకరం
కేవలం నెల రోజుల క్రితం వోల్వర్‌హాంప్టన్‌లో ఇద్దరు వృద్ధ సిక్కులపై ముగ్గురు యువకులు దాడి చేసిన ఘటన మరువక ముందే ఈ దారుణం జరగడం, యూకేలో వలసదారుల భద్రతపై తీవ్రమైన ప్రశ్నలు లేవనెత్తుతోంది.