Chanchalguda Jail: హైదరాబాద్లోని చంచల్గూడ కేంద్ర కారాగారంలో తీవ్ర ఉద్రిక్త పరిస్థితి నెలకొంది. జైల్లో ఖైదీలుగా ఉన్న ఇద్దరు రౌడీషీటర్ల మధ్య జరిగిన ఘర్షణ హింసాత్మకంగా మారింది. ఈ ఘర్షణలో ఒక రౌడీషీటర్పై మరో రౌడీషీటర్ హత్యా యత్నం చేయడంతో ఇద్దరికీ తీవ్ర గాయాలయ్యాయి. వివరాల్లోకి వెళ్తే, ఓ కేసులో రిమాండ్ ఖైదీగా జైలుకు వచ్చిన రౌడీషీటర్ జాబ్రీపై, అదే జైల్లో ఉన్న మరో రౌడీషీటర్ దస్తగిరి దాడికి పాల్పడ్డాడు. వీరిద్దరి మధ్య గతంలో ఉన్న పాత కక్షలే ఈ ఘర్షణకు కారణంగా తెలుస్తోంది.
Also Read: Delhi Car Blast: ఢిల్లీ కారు పేలుడు.. మరో కారు కోసం ఉరుకులు పరుగులు పెడుతున్న పోలీసులు!
దాడి సమయంలో దస్తగిరి, జాబ్రీపై ట్యాబ్లెట్ షీట్ను ఉపయోగించి గొంతు కోయడానికి ప్రయత్నించినట్లు సమాచారం. ఈ హింసాత్మక దాడిలో జాబ్రీకి తీవ్ర గాయాలయ్యాయి. వెంటనే స్పందించిన జైలు అధికారులు తీవ్రంగా గాయపడిన జాబ్రీని చికిత్స కోసం ఆసుపత్రికి తరలించారు. ఈ ఇద్దరు ఖైదీల మధ్య జరిగిన గొడవ కారణంగా జైలులోని ములాఖత్ రూమ్ అద్దాలు కూడా ధ్వంసమయ్యాయి. పరిస్థితి తీవ్రంగా మారడంతో జైలు లోపల, బయట పోలీసులు హై అలర్ట్ ప్రకటించి, ఉద్రిక్తతను అదుపులోకి తెచ్చారు.
ఈ తరహా ఘటనలు గతంలో కూడా జరిగాయి. గతంలో ఏప్రిల్ 2024లో చర్లపల్లి జైలులో కూడా ఖైదీలు గంజాయి కోసం గొడవకు దిగి, సిబ్బందిపై దాడి చేశారు. అప్పుడు గంజాయికి అలవాటుపడిన కొంతమంది అండర్ ట్రయల్ ఖైదీలను చంచల్గూడ నుంచి తరలించడం జరిగింది. అయితే, తాజా ఘటన మాత్రం ఇద్దరు రౌడీషీటర్ల మధ్య ఉన్న పాత కక్షల నేపథ్యంలో వ్యక్తిగత దాడిగా స్పష్టమవుతోంది.