Telusu Kada Trailer: యువ హీరో సిద్ధు జొన్నలగడ్డ నటించిన తాజా చిత్రం ‘తెలుసు కదా’ ట్రైలర్ నేడు అట్టహాసంగా విడుదలైంది. ఇప్పటికే టీజర్‌, పాటలతో మంచి బజ్‌ క్రియేట్‌ చేసిన ఈ సినిమా ట్రైలర్ మరింత ఆసక్తిని పెంచింది. రొమాంటిక్‌, ఎమోషనల్‌, ఫన్‌ మూమెంట్స్‌ కలగలసిన ఈ వీడియో ప్రేక్షకులను బాగా ఆకట్టుకుంటోంది.
ట్రైలర్‌లో సిద్ధు జొన్నలగడ్డ పాత్రలో కనిపించిన భావోద్వేగం హైలైట్‌గా నిలిచింది. ప్రేమలో ఎదురయ్యే సంతోషం, బాధను నిజ జీవితానికి దగ్గరగా చూపించినట్లు అనిపిస్తోంది. హీరోయిన్లుగా నటించిన రాశీ ఖన్నా, శ్రీనిధి శెట్టిల మధ్య కెమిస్ట్రీ కూడా ప్రత్యేకంగా ఆకట్టుకుంటోంది. వారి పాత్రలు కథలో కీలకమైన మలుపులు తెచ్చేలా ఉన్నాయి.
ప్రముఖ స్టైలిస్ట్‌గా పేరు పొందిన నీరజ కోన ఈ సినిమాతో దర్శకురాలిగా పరిచయం అవుతున్నారు. ఆమె చూపిన విజువల్ ప్రెజెంటేషన్‌, సన్నివేశాల నడిపింపు చాలా స్టైలిష్‌గా అనిపించాయి. ఈ ట్రైలర్ చూస్తేనే నీరజ తన తొలి సినిమాతోనే ఒక కొత్తదనం తీసుకొచ్చారని అనిపిస్తోంది. ఎస్‌.ఎస్‌. థమన్ అందించిన బ్యాక్‌గ్రౌండ్‌ స్కోర్‌ సినిమాకి అదనపు బలం ఇచ్చింది. రొమాంటిక్‌, ఎమోషనల్‌ సీన్లకు థమన్ ట్యూన్స్‌ సరైన ఫీల్‌ తీసుకొచ్చాయి. పాటలు ఇప్పటికే సోషల్ మీడియాలో ట్రెండ్‌ అవుతున్నాయి.