Hari Hara Veera Mallu: పవన్ కళ్యాణ్ నటిస్తున్న హరిహర వీరమల్లు చిత్రం థియేటర్లలో విడుదలకు సిద్ధమవుతోంది. అయితే, ఈ సినిమా తెలంగాణ సమరయోధుడు పండుగ సాయన్న జీవిత చరిత్రను వక్రీకరించిందని బీసీ సంఘాలు ఆరోపిస్తున్నాయి. సాయన్న జీవితాన్ని ఊహాజనిత కథగా మార్చి, వాస్తవాలను తారుమారు చేశారని వారి ఆగ్రహం. బీసీ సంఘాలు ఈ చిత్రాన్ని బహిష్కరించాలని నిర్ణయించాయి. హరిహర వీరమల్లు అనే ఊహాజనిత పాత్రను సృష్టించి, చరిత్రలో లేని కథను రూపొందించడం తమ సముదాయ స్వాభిమానానికి అవమానమని బీసీ సంఘాలు పేర్కొన్నాయి. ఈ వివాదం చిత్ర బృందానికి పెద్ద సవాలుగా మారింది. ఈ సినిమా జులై 24న విడుదల కానుంది. గతంలో ఈ చిత్రం పలుమార్లు వాయిదా పడింది. మొదట క్రిష్ జాగర్లమూడి దర్శకత్వం వహించగా, ఆ తర్వాత జ్యోతి కృష్ణ ఈ బాధ్యతను స్వీకరించారు. విడుదల సమీపిస్తున్న తరుణంలో బీసీ సంఘాల ఆందోళన చిత్ర యూనిట్‌కు తలనొప్పిగా మారింది.
