విపక్షాల కూటమి ఇండియా (I.N.D.I.A) తరపున ఉప రాష్ట్రపతి ఎన్నికలకు అభ్యర్థిగా తమిళనాడుకు చెందిన DMK నేత తిరుచ్చి శివ పేరు ప్రముఖంగా వినిపిస్తోంది. అధికార NDA కూటమి తమ అభ్యర్థిగా సీ.పీ. రాధాకృష్ణన్‌ను ప్రకటించిన నేపథ్యంలో, విపక్షాలు కూడా అదే తమిళ కార్డును ప్రయోగించాలని భావిస్తున్నట్లు రాజకీయ విశ్లేషకులు చెబుతున్నారు. ప్రస్తుతం ఈయన రాజ్యసభలో DMK పార్టీకి ప్రాతినిధ్యం వహిస్తున్నారు. ఆయన ఐదు సార్లు (1996, 2002, 2007, 2014, 2020) రాజ్యసభకు ఎన్నికయ్యారు. 1996లో లోక్‌సభకు కూడా ఎన్నికయ్యారు. DMK యూత్ వింగ్ డిప్యూటీ సెక్రటరీగా, తర్వాత కార్యదర్శిగా, ప్రచార కార్యదర్శిగా, డిప్యూటీ జనరల్ సెక్రటరీగా పనిచేశారు.
2014లో ట్రాన్స్ జెండర్ హక్కుల కోసం ఒక చారిత్రాత్మక ప్రైవేట్ మెంబర్ బిల్లును ప్రవేశపెట్టడం ద్వారా ఆయన గుర్తింపు పొందారు. బీజేపీ తరపున తమిళనాడుకు చెందిన రాధాకృష్ణన్‌ను నిలబెట్టడంతో, దానిని తిప్పికొట్టేందుకు విపక్షాలు కూడా అదే వ్యూహాన్ని అనుసరిస్తున్నట్లు తెలుస్తోంది. ఒక తమిళ నేతను ఎదురుగా నిలబెట్టడం ద్వారా బీజేపీపై ఒత్తిడి పెంచాలని భావిస్తున్నారు. పార్లమెంటులో సుదీర్ఘ అనుభవం, అన్ని పార్టీలతో వ్యక్తిగత సంబంధాలు ఉండటం తిరుచ్చి శివకు అనుకూలంగా ఉన్న అంశాలు. అధికారంలో ఉన్న DMK, తమ పార్టీ నుంచి అభ్యర్థిని నిలబెట్టడం ద్వారా తమ బలాన్ని ప్రదర్శించుకోవాలని చూస్తోంది. అయితే, ఈ ఎంపికపై విపక్ష కూటమిలోని అన్ని పార్టీల నుంచి ఏకాభిప్రాయం రావాల్సి ఉంది. కొన్ని నివేదికల ప్రకారం, తిరుచ్చి శివ ఎంపికపై తృణమూల్ కాంగ్రెస్ వంటి కొన్ని పార్టీలకు అభ్యంతరాలు ఉండవచ్చని సమాచారం.