Danam nagendar: ఖైరతాబాద్ ఎమ్మెల్యే, కాంగ్రెస్ నేత దానం నాగేందర్ నగరంలోని పేదల ఇళ్లను కూల్చివేస్తే కాస్త కూడా సహించబోమని స్పష్టం చేశారు. హైడ్రా అధికారుల వ్యవహారంలో కూడా వెనక్కి తగ్గే ఉద్దేశం లేదని ఆయన హెచ్చరించారు. మంగళవారం మీడియాతో మాట్లాడిన ఆయన, వైఎస్ రాజశేఖర రెడ్డి హయాంలోనూ తాను అధికారుల విషయంలో రాజీ పడలేదని తెలిపారు. ప్రజల కోసం అవసరమైతే జైలుకైనా వెళ్లేందుకు సిద్ధమని, ఇప్పటికే తనపై 173 కేసులు ఉన్నాయని వెల్లడించారు.
ప్రభుత్వం ప్రతిష్ఠాత్మకంగా చేపట్టిన హైడ్రా ఆపరేషన్‌పై అసంతృప్తి వ్యక్తం చేసిన నాగేందర్, తన ఇంట్లో వైఎస్ రాజశేఖర రెడ్డి, కేసీఆర్ ఫొటోలు ఉన్నాయని, అందులో తప్పేముంది? అని ప్రశ్నించారు. ప్రతి నాయకుడిపై ఎవరికైనా తమ అభిప్రాయం ఉంటుందని అన్నారు.
అంతేకాక, పటాన్‌చెరు ఎమ్మెల్యే క్యాంప్ కార్యాలయంలో కేసీఆర్ ఫొటో ఉండటంపై కాంగ్రెస్ కార్యకర్తలు ఆగ్రహం వ్యక్తం చేసిన విషయాన్ని ప్రస్తావించారు. పార్టీ ఫిరాయించిన ఎమ్మెల్యేలకు అసెంబ్లీ కార్యదర్శి నోటీసులు పంపించిన విషయాన్ని మీడియా ప్రస్తావించగా, ఇప్పటి వరకు తనకు ఎలాంటి నోటీసులు రాలేదని, వచ్చిన తర్వాత స్పందిస్తానని నాగేందర్ పేర్కొన్నారు.