Delhi: భారత సైన్యానికి తీవ్రమైన నష్టం జరిగిందంటూ పాకిస్థాన్ చేస్తున్న దుష్ప్రచారాన్ని భారత విదేశాంగ మంత్రిత్వ శాఖ తీవ్రంగా ఖండించింది. ఎస్-400, బ్రహ్మోస్ క్షిపణి వ్యవస్థలు ధ్వంసమయ్యాయని, భారత వైమానిక స్థావరాలు మరియు ఆయుధాగారాలపై దాడులు జరిగాయని పాకిస్థాన్ చెబుతున్న ఆరోపణలు పూర్తిగా నిరాధారమైనవని మంత్రిత్వ శాఖ స్పష్టం చేసింది.
ఉగ్రవాద శిబిరాలపై భారత్ చేపట్టిన చర్యల అనంతరం ఇరు దేశాల మధ్య కాల్పుల విరమణకు ఒప్పందం కుదిరింది. అయితే, ఆ తరవాతే పాకిస్థాన్ తప్పుడు వార్తలతో భ్రమ సృష్టించాలని చూస్తోందని విదేశాంగ శాఖ వ్యాఖ్యానించింది.
ఈ సందర్భంగా ఏర్పాటు చేసిన విలేకరుల సమావేశంలో కల్నల్ సోఫియా ఖురేషి మాట్లాడుతూ, “పాకిస్థాన్ తమ జేఎఫ్-17 యుద్ధ విమానాలతో మా ఎస్-400, బ్రహ్మోస్ స్థావరాలను ధ్వంసం చేశారన్నది పూర్తిగా అబద్ధం. సిర్సా, జమ్మూ, పఠాన్‌కోట్, భటిండా, నలియా, భుజ్ వంటి వైమానిక స్థావరాలకు ఏ విధమైన నష్టం జరగలేదు” అని చెప్పారు.
అలాగే, చండీగఢ్ మరియు వ్యాస్ ప్రాంతాల్లోని ఆయుధాగారాలు దెబ్బతిన్నాయన్న పాకిస్థాన్ వాదనలు కూడా అసత్యమని ఆమె స్పష్టం చేశారు.
పాక్ చేస్తున్న మరో ఆరోపణ, అంటే భారత సైన్యం మసీదులను ధ్వంసం చేసిందన్న ఆరోపణపై స్పందించిన ఖురేషి, “భారత్ ఒక లౌకిక రాజ్యంగా, సైన్యం కూడా రాజ్యాంగ విలువలకు కట్టుబడి ఉంటుంది. మత స్థలాలను లక్ష్యంగా చేసేది కాదు” అని స్పష్టం చేశారు.
ఇందుకు తోడు, ప్రెస్ ఇన్ఫర్మేషన్ బ్యూరో (PIB)కి చెందిన ఫ్యాక్ట్ చెక్ విభాగం కూడా ఈ దుష్ప్రచారాన్ని తప్పుపడింది.