Amla Benefits: శీతాకాలం మొదలవుతోంది. ఈ సమయంలో మన ఆరోగ్యంపై మరింత శ్రద్ధ పెట్టడం చాలా ముఖ్యం. మన భారతీయ ఆయుర్వేదంలో ‘అమృత ఫలం’ అని పిలవబడే చిన్న ఉసిరికాయ మనకు ఎన్నో ఆరోగ్య ప్రయోజనాలను అందిస్తుంది. ఈ ఒక్క పండు ఆరోగ్యాన్ని, అందాన్ని లోపలి నుంచి పెంచే శక్తి కలిగి ఉంది.
ఉసిరి ఎందుకు గొప్పది?
ఉసిరికాయలో విటమిన్ ‘సి’ చాలా ఎక్కువగా ఉంటుంది. ఇది సహజంగా లభించే విటమిన్ ‘సి’ నిల్వల్లోకెల్లా అత్యంత ఉత్తమమైనది. ఇది మన శరీరంలోని రోగనిరోధక శక్తిని బలపరుస్తుంది. జబ్బులు రాకుండా మనల్ని కాపాడుతుంది.
ఈ రోజుల్లో మనం తినే జంక్ ఫుడ్, పడే ఒత్తిడి కారణంగా మన శరీరం లోపల బలహీనపడుతుంది. అలాంటి బలహీనతను పోగొట్టి, శక్తిని పెంచడానికి ఉసిరి ఒక అద్భుతమైన ఔషధంలా పనిచేస్తుంది. దీనిని పచ్చిగా, జ్యూస్‌గా, పచ్చడి లేదా పొడి రూపంలో ఎలాగైనా తినవచ్చు.
ఉసిరి తినడం వలన కలిగే 5 ముఖ్యమైన ప్రయోజనాలు ఇవే:
1. రోగనిరోధక శక్తికి రక్షణ: ఉసిరికాయలో నారింజ పండు కంటే కూడా ఎక్కువ విటమిన్ ‘సి’ ఉంటుంది. ఇది శరీరంలో శక్తిని పెంచే యాంటీఆక్సిడెంట్లను అందించి, ఇమ్యూనిటీని చాలా బలపరుస్తుంది. ప్రతి రోజు ఉసిరి తీసుకుంటే, చలికాలంలో వచ్చే జలుబు, ఫ్లూ మరియు ఇతర వైరల్ జ్వరాల నుంచి రక్షణ లభిస్తుంది.
2. మెరిసే చర్మం మీ సొంతం: ఉసిరి తినడం వలన చర్మం కాంతిని సంతరించుకుంటుంది, ముఖంపై వచ్చే ముడతలు తగ్గుతాయి. ఇందులో ఉండే గుణాలు చర్మాన్ని బిగుతుగా, యవ్వనంగా ఉంచడానికి సహాయపడతాయి. ఉదయం ఖాళీ కడుపుతో ఉసిరి రసం తాగితే, ముఖం సహజంగా మెరుస్తుంది, మొటిమలు కూడా తగ్గుతాయి.
3. బలమైన, నిగనిగలాడే జుట్టు: ఉసిరికాయ జుట్టుకు ఒక వరం లాంటిది. ఇందులో ఉండే ఐరన్ మరియు యాంటీఆక్సిడెంట్లు జుట్టు మూలాలను బలంగా చేస్తాయి, చిన్న వయసులోనే జుట్టు తెల్లబడకుండా కాపాడతాయి. ఉసిరి నూనెతో తలకు మసాజ్ చేసుకుంటే జుట్టు పెరుగుదల మెరుగుపడుతుంది, జుట్టు రాలడం కూడా తగ్గుతుంది.
4. జీర్ణవ్యవస్థను ఆరోగ్యంగా ఉంచుతుంది: ఉసిరిలో ఫైబర్ ఎక్కువగా ఉంటుంది. ఇది మనం తిన్న ఆహారం సులభంగా అరిగేలా చేస్తుంది. మలబద్ధకం, గ్యాస్, అసిడిటీ లాంటి కడుపు సమస్యల నుంచి ఉపశమనం ఇస్తుంది. ఉదయం ఉసిరి పొడి లేదా రసం తీసుకుంటే కడుపు శుభ్రపడుతుంది, శరీరం నుంచి వ్యర్థాలు బయటకు పోతాయి.
5. షుగర్, కొలెస్ట్రాల్‌ను తగ్గిస్తుంది: మధుమేహం (షుగర్) ఉన్నవారికి, గుండె జబ్బులు ఉన్నవారికి ఉసిరి చాలా మేలు చేస్తుంది. ఇది రక్తంలో చక్కెర స్థాయిలను అదుపులో ఉంచడానికి సాయపడుతుంది. చెడు కొలెస్ట్రాల్‌ను తగ్గిస్తుంది. దీని వలన గుండె ఆరోగ్యం మెరుగుపడి, రోజంతా ఉల్లాసంగా, శక్తివంతంగా ఉండవచ్చు.
మరి ఇంకెందుకాలాస్యం, ఈ చలికాలంలో మీ ఆహారంలో ఉసిరికాయను భాగం చేసుకోండి, ఆరోగ్యంగా మరియు అందంగా ఉండండి!