Ladakh: కేంద్రపాలిత ప్రాంతం అయిన లడఖ్‌లో గత కొద్ది రోజులుగా జరుగుతున్న నిరసనలు మరింత తీవ్రమయ్యాయి. లడఖ్‌కు రాష్ట్ర హోదా, రాజ్యాంగ రక్షణలు కల్పించాలని డిమాండ్ చేస్తూ విద్యార్థులు, ప్రజా సంఘాలు, స్థానిక నాయకులు ఏకమయ్యారు. లడఖ్ రాజధాని నగరం లేహ్‌లో జరిగిన ఆందోళనల్లో ఉద్రిక్త వాతావరణం నెలకొంది.
పోలీసులతో ఘర్షణలు.. వాహనం దగ్ధం
సోమవారం లేహ్‌లో భారీ ఎత్తున నిరసన ర్యాలీ జరిగింది. ఈ సందర్భంగా ఆందోళనకారులు రోడ్ల మీదకు వచ్చి నినాదాలు చేశారు. పరిస్థితి అదుపు తప్పడంతో పోలీసులు వారిని అడ్డుకునే ప్రయత్నం చేశారు. దీంతో ఆందోళనకారులు, పోలీసుల మధ్య ఘర్షణలు చోటు చేసుకున్నాయి. ఆవేశంలో ఆందోళనకారులు ఒక పోలీసు వాహనాన్ని దగ్ధం చేశారు. ఈ ఘటనతో అక్కడ ఒక్కసారిగా ఉద్రిక్తత పెరిగింది.
పోరాటం ఆగదు..
లడఖ్‌కు ప్రత్యేక హోదా కల్పించే వరకు తమ పోరాటం ఆగదని నిరసనకారులు హెచ్చరించారు. అక్టోబర్ 6న కేంద్ర ప్రభుత్వం లడఖ్ ప్రతినిధులతో చర్చలు జరపనున్నట్లు ప్రకటించినా, ఆందోళనకారులు మాత్రం కేంద్రం కేవలం కాలయాపన చేస్తుందని మండిపడుతున్నారు. వారికి ప్రభుత్వంపై నమ్మకం లేదని స్పష్టం చేస్తున్నారు.
ఈ పోరాటానికి కారణం ఏమిటి?
2019లో జమ్మూ కాశ్మీర్ రాష్ట్ర హోదాను రద్దు చేసి, లడఖ్‌ను కేంద్రపాలిత ప్రాంతంగా మార్చారు. అప్పటి నుండి లడఖ్‌కు రాష్ట్ర హోదా కల్పించాలని, రాజ్యాంగంలోని ఆరో షెడ్యూల్ ప్రకారం వారికి ప్రత్యేక రక్షణలు ఇవ్వాలని డిమాండ్లు పెరుగుతున్నాయి. ఈ నేపథ్యంలో, ఇప్పుడు జరుగుతున్న నిరసనలు లడఖ్ భవిష్యత్తును నిర్ణయించే కీలక మలుపుగా మారాయి. ఈ సమస్యకు కేంద్రం ఎలా పరిష్కారం చూపుతుందో చూడాలి.