Vakeel Saab: పవర్ స్టార్ పవన్ కళ్యాణ్ కెరీర్‌లో బిగ్గెస్ట్ హైప్‌తో రూపొందిన ‘వకీల్ సాబ్’ సినిమా కరోనా కష్టకాలంలో విడుదలై బాక్సాఫీస్ వద్ద సంచలన ఓపెనింగ్స్ రాబట్టింది. ఈ చిత్రం రిలీజై నాలుగేళ్లు పూర్తయిన సందర్భంగా అభిమానులు ఆనందోత్సాహాల్లో మునిగితేలుతున్నారు. సంగీత దర్శకుడు థమన్ ఈ సినిమాను తన కెరీర్‌లో ఓ మైలురాయిగా అభివర్ణించారు. పవన్ కళ్యాణ్‌తో తొలిసారి కలిసి పనిచేసిన అనుభవం తన జీవితంలో మరిచిపోలేనిదని ఆయన ఎమోషనల్ అయ్యారు. ఈ సందర్భంగా ఓ స్పెషల్ వీడియోను సోషల్ మీడియాలో షేర్ చేసిన థమన్.. పవన్ కళ్యాణ్, దర్శకుడు వేణు శ్రీరామ్, రచయిత త్రివిక్రమ్, నిర్మాత దిల్ రాజులకు హృదయపూర్వక కృతజ్ఞతలు తెలిపారు.
కరోనా సంక్షోభం మధ్య విడుదలైన ఈ సినిమా తనకు ఎమోషనల్ రోలర్‌కోస్టర్ లాంటిదని థమన్ వెల్లడించారు. ఇక పవన్ ఫ్యాన్స్ కూడా సోషల్ మీడియా వేదికగా ‘వకీల్ సాబ్’ గురించి గత జ్ఞాపకాలను నెమరువేసుకుంటూ సంబరాలు చేసుకుంటున్నారు. కరోనా లాంటి ప్రతికూల పరిస్థితుల్లోనూ ఈ చిత్రం సాధించిన విజయం అభిమానులకు ఇప్పటికీ గర్వకారణంగా నిలుస్తోంది. ‘వకీల్ సాబ్’ సినిమా పవన్ కళ్యాణ్ ఖాతాలో మరో బ్లాక్‌బస్టర్‌గా చేరిపోయిందని అభిమానులు సంతోషం వ్యక్తం చేస్తున్నారు.