Uttam Kumar Reddy: తెలంగాణకు కృష్ణా నది జలాల్లో అన్యాయం జరుగుతోందని రాష్ట్ర జలవనరుల శాఖ మంత్రి ఉత్తమ్ కుమార్ రెడ్డి ఆందోళన వ్యక్తం చేశారు. కృష్ణా జలాలను ఆంధ్రప్రదేశ్ అన్యాయంగా తరలించుకుంటోందని పేర్కొంటూ, ఈ విషయంపై కేంద్ర జలశక్తి శాఖ మంత్రి సి.ఆర్. పాటిల్‌కు ఫిర్యాదు చేసినట్లు తెలిపారు.
కేంద్రం జోక్యం చేసుకోవాలి
కృష్ణా నదీ జలాలను సమర్థవంతంగా వినియోగించుకునేందుకు తెలంగాణకు పూర్తి న్యాయం జరగాలని, ఏపీ అన్యాయాన్ని అరికట్టేందుకు కేంద్రం తక్షణం జోక్యం చేసుకోవాలని మంత్రి ఉత్తమ్ కుమార్ రెడ్డి కోరారు. తెలంగాణకు తగినంత నీటి కేటాయింపులు జరగాల్సిన అవసరం ఉందని ఆయన స్పష్టం చేశారు.
పాలమూరు-రంగారెడ్డి ప్రాజెక్టులకు న్యాయం చేయాలి
ఈ సందర్భంగా మంత్రి ఉత్తమ్ పాలమూరు-రంగారెడ్డి ఎత్తిపోతల పథకానికి తగినంత నీటి కేటాయింపులు జరిపించాలని, ప్రాజెక్టుల నిర్మాణానికి అవసరమైన నిధులను కేంద్రమంత్రి వెంటనే మంజూరు చేయాలని కోరారు.
కేంద్రమంత్రి సానుకూల స్పందన
తెలంగాణ ప్రభుత్వం ఉద్ఘాటించిన అంశాలను కేంద్రమంత్రి సి.ఆర్. పాటిల్ సానుకూలంగా పరిగణించినట్లు మంత్రి ఉత్తమ్ తెలిపారు. తెలంగాణ రాష్ట్రానికి కృష్ణా జలాల విషయంలో న్యాయం జరిగేలా చర్యలు తీసుకుంటామని కేంద్రమంత్రి హామీ ఇచ్చినట్లు వివరించారు.
తెలంగాణకు కృష్ణా జలాల్లో హక్కు దక్కేలా ప్రభుత్వం పోరాడుతుందని, రైతులకు నీటి కొరత లేకుండా చర్యలు చేపడతామని మంత్రి ఉత్తమ్ కుమార్ రెడ్డిస్పష్టం చేశారు.