Trump-Modi: మలేషియా రాజధాని కౌలాలంపూర్‌లో అక్టోబర్‌లో జరగనున్న ASEAN (ఆగ్నేయాసియా దేశాల సమాఖ్య) శిఖరాగ్ర సమావేశంపై ఇప్పుడు ప్రపంచం దృష్టి సారించింది. ఈ సదస్సులో అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోడీ ఇద్దరూ పాల్గొనే అవకాశం ఉన్నందున, వారిద్దరి మధ్య భేటీ ఉంటుందా అనేది ఇప్పుడు ఆసక్తికరంగా మారింది.అక్టోబర్ 26 నుంచి 28 వరకు జరిగే ఈ 47వ ASEAN సమ్మిట్‌కు యు.ఎస్. అధ్యక్షుడు డొనాల్డ్ ట్రంప్, భారత ప్రధాని నరేంద్ర మోడీ హాజరవుతారని మలేషియా ప్రధాని అన్వర్ ఇబ్రహీం ధృవీకరించారు. ఈ సదస్సులో భాగంగా ఇరు దేశాల నాయకులు ద్వైపాక్షిక చర్చల కోసం ప్రత్యేకంగా సమావేశమయ్యే అవకాశం ఉందని అంతర్జాతీయ మీడియా నివేదించింది.
ఇది కూడా చదవండి: iPhone 17: ఐఫోన్‌ 17 కోసం.. యాపిల్‌ స్టోర్ల ముందు బారులు
ఇటీవలి కాలంలో, యు.ఎస్. ప్రభుత్వం భారతదేశంపై విధించిన టారిఫ్‌ల (సుంకాలు) కారణంగా ఇరు దేశాల మధ్య కొంత ఉద్రిక్తత నెలకొంది. ఈ నేపథ్యంలో, ఈ సమావేశం చాలా కీలకమైనదిగా పరిగణించబడుతోంది. ట్రంప్ పరిపాలన భారతదేశంపై 50% టారిఫ్‌లు విధించడంతో సంబంధాలు దెబ్బతిన్నాయి. అయితే, ఇటీవలే ట్రంప్ మోడీకి 75వ పుట్టినరోజు శుభాకాంక్షలు తెలుపుతూ ఫోన్ చేయడంతో ఇరు దేశాల మధ్య సంబంధాలు మెరుగుపడ్డాయని భావిస్తున్నారు. ఈ భేటీ రెండు దేశాల మధ్య స్వేచ్ఛా వాణిజ్య ఒప్పందంపై చర్చలకు దారి తీయవచ్చు.ట్రంప్ తన మొదటి పదవీకాలంలో కేవలం ఒక్కసారి మాత్రమే ASEAN సదస్సులకు హాజరయ్యారు. కాబట్టి, ఈసారి ఆయన హాజరు కావడం, ఆసియా పసిఫిక్ ప్రాంతానికి అమెరికా ఎంత ప్రాధాన్యత ఇస్తుందో సూచిస్తుందని విశ్లేషకులు చెబుతున్నారు. ఈ సమావేశంలో కేవలం ద్వైపాక్షిక అంశాలే కాకుండా, అంతర్జాతీయ వాణిజ్య వ్యవస్థ, AI, డిజిటల్ ట్రాన్స్‌ఫర్మేషన్ వంటి అనేక అంశాలు చర్చకు రానున్నాయి.