Tirumala: తిరుమలలో భక్తులకు వసతి గదుల కేటాయింపుపై టీటీడీ (తిరుమల తిరుపతి దేవస్థానం) కొత్త మార్గదర్శకాలను అమల్లోకి తెచ్చింది. ఇకపై, దర్శనం టికెట్ ఉన్న భక్తులకే వసతి గదులు అందించనున్నట్లు ప్రకటించింది. దళారీల అక్రమ దందాలకు అడ్డుకట్ట వేసే ఉద్దేశంతో ఈ నిర్ణయం తీసుకున్నట్లు అధికారులు తెలిపారు.
వీఐపీ భక్తులకు కొత్త నిబంధనలు
టిటిడి తాజాగా తీసుకున్న నిర్ణయం ప్రకారం, ఇకపై వీఐపీ భక్తులకు వసతి గదులు కేటాయించాలంటే, శ్రీవారి దర్శనం టికెట్ ఉండటం తప్పనిసరి. గతంలో ఆధార్ కార్డు ఆధారంగా గదులు కేటాయించేవారు. అయితే, దళారులు దీనిని దుర్వినియోగం చేస్తూ, అధిక ధరలకు గదులను విక్రయిస్తున్నారని పలువురు భక్తులు ఫిర్యాదు చేయడంతో, ఈ కొత్త విధానాన్ని తీసుకువచ్చారు.
గదుల విభజన
తిరుమలలో మొత్తం సుమారు 7,500 గదులు ఉన్నాయి. వీటిలో:
3,500 గదులు – సాధారణ భక్తులకు సీఆర్వో పరిధిలో కరెంట్ బుకింగ్ ద్వారా
1,580 గదులు – భక్తులకు అడ్వాన్స్ బుకింగ్ కింద
400 గదులు – విరాళదాతల కోసం
450 గదులు – సిఫార్సు లేఖ ఆధారంగా
మిగిలిన గదులు వీఐపీ భక్తులకు కేటాయించబడతాయి.
దళారీల అక్రమ దందాలకు చెక్
ఇప్పటివరకు, వీఐపీ గదులను ఆధార్ కార్డు ఆధారంగా పొందే దళారులు, వాటిని తమ అధీనంలో ఉంచుకుని అధిక ధరలకు విక్రయించేవారు. ఒక గదిని 48 గంటలపాటు వినియోగించుకునే వెసులుబాటు ఉండటంతో, రోజుకు ఇద్దరు లేదా ముగ్గురు భక్తులకు దళారులు ఈ గదులను కేటాయిస్తూ లాభపడేవారు. ఈ దందాలకు అడ్డుకట్ట వేసేందుకు టిటిడి కొత్త విధానాన్ని తీసుకువచ్చింది.
కొత్త విధానం అమలు ఎలా జరుగుతోంది?
ఇకపై వసతి గదులు పొందాలంటే, ఆధార్ కార్డుతో పాటు శ్రీవారి దర్శనం టికెట్ కూడా చూపించాలి.గదులను పద్మావతి విచారణ కేంద్రం, ఎంబీసీ, టీబీ కౌంటర్ల వద్ద కేటాయిస్తారు.
భక్తులు దర్శనం పూర్తయిన వెంటనే గదులు ఖాళీ చేస్తుండటంతో, అరగంటలోపు మరో భక్తులకు ఆ గదులు కేటాయించడానికి వీలు కలుగుతోంది.
పారదర్శకత, ఆదాయ పెంపు
ఈ కొత్త విధానం అమలుతో దళారీల అక్రమార్జనకు చెక్ పడడమే కాకుండా, టిటిడి ఆదాయం కూడా పెరిగిందని అధికారులు తెలిపారు. భక్తులకు సరళమైన విధానంలో వసతి లభించేలా ఈ మార్పులు ఎంతోఉపయోగకరంగా ఉంటాయని విశ్వసిస్తున్నారు.