Konda Surekha: మధ్యాహ్న భోజన పథకం కార్మికుల ఆందోళనతో హనుమకొండలోని రామ్‌నగర్‌లో ఉద్రిక్త పరిస్థితి నెలకొంది. తమ సమస్యలను పరిష్కరించాలని డిమాండ్ చేస్తూ కార్మికులు రాష్ట్ర మంత్రి కొండా సురేఖ ఇంటిని ముట్టడించేందుకు ప్రయత్నించారు.
అసలేం జరిగింది?
మధ్యాహ్న భోజన పథకాన్ని అక్షయపాత్ర ఫౌండేషన్‌కు అప్పగించవద్దని నిరసనకారులు పెద్ద ఎత్తున నినాదాలు చేశారు. ఈ నిర్ణయం వల్ల తాము ఉపాధి కోల్పోతామని ఆందోళన వ్యక్తం చేశారు. గత 8 నెలలుగా పెండింగ్‌లో ఉన్న బిల్లులను వెంటనే చెల్లించాలని, తమ వేతనాలు పెంచాలని డిమాండ్ చేశారు.
మంత్రి ఇంట్లోకి చొరబడేందుకు ప్రయత్నించిన కార్మికులను సుబేదారి పోలీసులు అడ్డుకున్నారు. వారిని బలవంతంగా అరెస్టు చేసి పోలీస్ స్టేషన్‌కు తరలించారు. ఈ ఘటనతో ఆ ప్రాంతంలో కొంతసేపు ఉద్రిక్త వాతావరణం కనిపించింది.
కార్మికుల ప్రధాన డిమాండ్లు:
* మధ్యాహ్న భోజన పథకాన్ని అక్షయపాత్ర ఫౌండేషన్‌కు అప్పగించవద్దు.
* గత 8 నెలల పెండింగ్ బిల్లులు వెంటనే చెల్లించాలి.
* తమ వేతనాలు పెంచాలి.
* కార్మికులకు ఉద్యోగ భద్రత కల్పించాలి.