Telangana Bandh: తెలంగాణలో స్థానిక సంస్థల ఎన్నికల్లో బీసీలకు 42 శాతం రిజర్వేషన్లు కల్పించాలనే న్యాయమైన డిమాండ్‌తో బీసీ ఐక్య కార్యాచరణ కమిటీ (ఐకాస) నేడు, శనివారం, రాష్ట్ర బంద్‌కు పిలుపునిచ్చింది. ‘బంద్ ఫర్ జస్టిస్’ (న్యాయం కోసం బంద్) పేరిట సాగుతున్న ఈ పోరాటానికి రాష్ట్రంలోని సకల జనులు, రాజకీయ పార్టీలు, విద్యార్థి, ప్రజా సంఘాల నుంచి పూర్తి మద్దతు లభించింది.
ఈ బంద్‌కు అధికార కాంగ్రెస్, ప్రతిపక్షాలైన బీఆర్‌ఎస్, బీజేపీ తో పాటు సీపీఐ, సీపీఎం, టీజేఎస్, ఎమ్మార్పీఎస్ వంటి పలు అఖిల పక్షాలు, సంఘాలు సంఘీభావం తెలిపాయి. బంద్ సందర్భంగా ఆర్టీసీ బస్సులు ఉదయం పూట డిపోలకే పరిమితమయ్యే అవకాశం ఉంది. అనేక విద్యా సంస్థలు, ఇంజనీరింగ్ కళాశాలలు ఇప్పటికే సెలవు ప్రకటించాయి.
స్థానిక సంస్థల ఎన్నికల్లో బీసీ రిజర్వేషన్లకు సంబంధించి హైకోర్టు స్టే విధించడం, సుప్రీంకోర్టులో రాష్ట్ర ప్రభుత్వానికి చుక్కెదురు కావడంతో ఈ ఉద్యమం మరింత ఉధృతమైంది. ఈ నేపథ్యంలో, రిజర్వేషన్ల అంశాన్ని పార్లమెంట్‌లో చట్టం చేసి, 9వ షెడ్యూల్‌లో చేర్చాలని బీసీ ఐకాస నాయకులు కేంద్రాన్ని బలంగా డిమాండ్ చేస్తున్నారు. బీసీ ఐకాస చైర్మన్ ఆర్‌. కృష్ణయ్య మాట్లాడుతూ, ఈ బంద్ ఎవరికీ వ్యతిరేకం కాదని, కేవలం బీసీల న్యాయమైన హక్కుల సాధన కోసమేనని స్పష్టం చేశారు. ఈ పోరాటం ద్వారా బీసీల ఆకాంక్షను ఢిల్లీ పాలకులకు వినిపించాలనేదే ప్రధాన లక్ష్యమని ఐకాస ప్రతినిధులు వెల్లడించారు.
బంద్ శనివారం తెల్లవారుజామున 4 గంటల నుంచి సాయంత్రం 5 గంటల వరకు కొనసాగనుంది. ఈ సమయంలో ఆర్టీసీ బస్సులను బయటకు రానీయకుండా నిలువరించడం, డిపోల ముందు ధర్నాలు, జాతీయ రహదారుల దిగ్బంధం, టోల్‌ప్లాజాల వద్ద నిరసనలు వంటి కార్యక్రమాలు చేపట్టనున్నారు. అన్ని దుకాణాలు, పెట్రోల్ బంకులు, వ్యాపార సంస్థలు స్వచ్ఛందంగా మూసివేసి సహకరించాలని ఐకాస కోరింది. అయితే, అంబులెన్సులు, ఆసుపత్రులు, మెడికల్ షాపులు వంటి అత్యవసర సేవలకు ఈ బంద్ నుంచి మినహాయింపు ఉంటుంది.
అఖిల పక్షాల మద్దతు
శుక్రవారం, బీసీ జేఏసీ ఆధ్వర్యంలో హైదరాబాద్‌లో బాబూ జగ్జీవన్‌రామ్ విగ్రహం నుంచి ట్యాంక్ బండ్ డా. బీఆర్ అంబేద్కర్ విగ్రహం వరకు భారీ ర్యాలీ జరిగింది. ఈ ర్యాలీలో బీసీ జేఏసీ చైర్మన్ ఆర్‌. కృష్ణయ్య, ఎమ్మార్పీఎస్ వ్యవస్థాపక అధ్యక్షుడు మందకృష్ణ మాదిగ, టీజేఎస్ అధ్యక్షుడు ప్రొఫెసర్ కోదండరాం తో పాటు అధికార, ప్రతిపక్ష పార్టీల ముఖ్య నేతలు పాల్గొని బంద్‌కు సంఘీభావం ప్రకటించారు. కాంగ్రెస్ పీసీసీ చీఫ్ మహేశ్‌కుమార్‌ గౌడ్, మంత్రులు, ఎమ్మెల్యేలు సైతం బంద్‌లో పాల్గొంటారని ప్రకటించారు. బీఆర్‌ఎస్ వర్కింగ్ ప్రెసిడెంట్ కేటీఆర్‌ కూడా బంద్‌కు సంపూర్ణ మద్దతునిస్తున్నట్లు తెలిపారు.
అయితే, సీపీఎం నాయకులు జాన్ వెస్లీ స్థానిక సంస్థల్లో 42% రిజర్వేషన్లు కల్పించేలా గవర్నర్‌ కేంద్రానికి సిఫార్సు చేయాలంటూ రాజ్‌భవన్‌ వద్ద చేసిన ఛలో రాజ్‌భవన్‌ కార్యక్రమం ఉద్రిక్తతకు దారితీసింది. ఈ సందర్భంగా కొంతమంది నాయకులను పోలీసులు అరెస్టు చేశారు. బీసీ రిజర్వేషన్ల విషయంలో బీజేపీ, కాంగ్రెస్ పార్టీలు ద్వంద్వ వైఖరిని అవలంబిస్తున్నాయని కొందరు నేతలు విమర్శించారు.
బీసీ రిజర్వేషన్లు సాధించే వరకు తెలంగాణ ఉద్యమం తరహాలోనే పోరాటం కొనసాగిస్తామని బీసీ ఐకాస వర్కింగ్ చైర్మన్ జాజుల శ్రీనివాస్‌గౌడ్ ప్రకటించారు. బంద్‌ను శాంతియుతంగా, ప్రజాస్వామ్యబద్ధంగా విజయవంతం చేయాలని ఆయన బీసీ శ్రేణులకు పిలుపునిచ్చారు. రిజర్వేషన్ల సాధన కోసం ఈ నెల 24న చలో హైదరాబాద్ కార్యక్రమం నిర్వహించి ఇందిరాపార్కు ధర్నా చౌక్ వద్ద మహాధర్నా చేపట్టనున్నట్లు కూడా బీసీ సంఘాల నేతలు వెల్లడించారు. ఈ నేపథ్యంలో, బంద్ రోజు రాష్ట్ర ప్రజలు తమ ప్రయాణాలను వాయిదా వేసుకోవాలని ఐకాస విజ్ఞప్తి చేసింది. బంద్ పేరుతో చట్ట వ్యతిరేక కార్యకలాపాలకు పాల్పడితే కఠినంగా వ్యవహరిస్తామని డీజీపీ శివధర్‌రెడ్డి హెచ్చరించారు.