Shubham Collections: టాలీవుడ్ స్టార్ బ్యూటీ సమంత తొలిసారిగా నిర్మాతగా మారి ‘శుభం’ చిత్రాన్ని అందించారు. దర్శకుడు ప్రవీణ్ కండ్రేగుల రూపొందించిన ఈ హారర్ కామెడీ చిత్రం ప్రేక్షకులను ఆకట్టుకుంటోంది. హర్షిత్ రెడ్డి, గవిరెడ్డి శ్రీనివాస్, చరణ్ పేరీ, శ్రియా కొంతం, శ్రావణి లక్ష్మి, శాలిని తదితరులు కీలక పాత్రల్లో నటించిన ఈ సినిమాకు బాక్సాఫీస్ వద్ద సానుకూల స్పందన లభిస్తోంది.
చిత్రం విడుదలైన తొలిరోజు కలెక్షన్స్ సామాన్యంగా ఉన్నప్పటికీ, ఫస్ట్ వీకెండ్ ముగిసే సరికి వరల్డ్‌వైడ్‌గా రూ.5.25 కోట్ల గ్రాస్ వసూళ్లను సాధించి అందరి దృష్టిని ఆకర్షించింది. ఈ విజయంతో చిత్ర యూనిట్ హర్షం వ్యక్తం చేస్తూ, ‘శుభం’ బ్లాక్‌బస్టర్ హిట్‌గా నిలిచిందని ప్రకటించింది. సమంత నిర్మాణంలో వచ్చిన ఈ చిత్రం ప్రేక్షకులను ఉర్రూతలూగిస్తూ, హాస్యంతో పాటు భయానక అనుభూతిని పంచుతోంది. ఈ సినిమా పూర్తి రన్‌లో ఎంతమేర వసూళ్లు రాబడుతుందనేది ఆసక్తికరంగా మారింది. ‘శుభం’ సక్సెస్‌తో సమంత నిర్మాతగా తన సత్తా చాటారని అభిమానులు కొనియాడుతున్నారు.