Sharmila: ఆంధ్రప్రదేశ్‌లో వైఎస్‌ఆర్ కాంగ్రెస్ పార్టీ (వైసీపీ) ప్రభుత్వ హయాంలో భారీ స్థాయిలో మద్యం కుంభకోణం జరిగిందని ఏపీసీసీ అధ్యక్షురాలు వైఎస్ షర్మిల తీవ్ర ఆరోపణలు చేశారు. ఈ మద్యం కుంభకోణానికి సంబంధించి పూర్తి అవినీతిని బయటపెట్టాలని ఆమె డిమాండ్ చేశారు.
సిట్ (ప్రత్యేక దర్యాప్తు బృందం) దాఖలు చేసిన ఛార్జిషీట్‌లో కీలక విషయాలు ఉన్నాయని షర్మిల వెల్లడించారు. ఈ ఛార్జిషీట్ ప్రకారం, అప్పటి ముఖ్యమంత్రి వైఎస్ జగన్‌కు నెలకు రూ.50 నుంచి 60 కోట్ల రూపాయలు అక్రమంగా చేరినట్లు స్పష్టంగా ఉందని ఆమె పేర్కొన్నారు. మొత్తం సుమారు రూ.3,500 కోట్ల అవినీతి సొమ్ము వైసీపీ నాయకులకు చేరిందని ఆమె ఆరోపించారు.
Also Read: Plane Crash: రష్యాలో ఘోర విమాన ప్రమాదం.. 49 మంది మృతి
లిక్కర్ స్కాంలో అనేక మంది అరెస్టయ్యారు. కానీ జగన్‌పై మాత్రం ఎలాంటి చర్యలు తీసుకోవడం లేదు. ఇది ఎవరికి తెలియని విషయం కాదు” అని షర్మిల తీవ్రంగా వ్యాఖ్యానించారు. ఈ కుంభకోణంలో జగన్ పాత్రను కేంద్ర ఏజెన్సీలు ఎందుకు పట్టించుకోవడం లేదని ఆమె ప్రశ్నించారు.
మద్యం విక్రయాలలో డిజిటల్ చెల్లింపులను అనుమతించకపోవడం ఒక పెద్ద నేరమని షర్మిల విమర్శించారు. నాన్‌-డ్యూటీ పెయిడ్‌ (పన్ను చెల్లించని) మద్యం విక్రయాల కోసమే డిజిటల్ చెల్లింపులకు అనుమతి ఇవ్వలేదని ఆమె అన్నారు. దీనివల్ల భారీ స్థాయిలో అక్రమాలు జరిగాయని ఆమె అభిప్రాయపడ్డారు.
గత ఐదేళ్ల వైసీపీ ప్రభుత్వ హయాంలో, బ్రాండెడ్ లిక్కర్‌కు అనుమతి ఇవ్వకుండా నాసిరకం మద్యాన్ని ప్రోత్సహించిందని షర్మిల తీవ్ర ఆరోపణలు చేశారు. నాసిరకం మద్యం సేవించి ప్రజలు అనారోగ్యం పాలయ్యారని ఆమె అన్నారు. ఈ మద్యం కుంభకోణంలో జరిగిన అవినీతి మొత్తాన్ని ప్రజలకు జగన్ సమాధానం చెప్పాలని ఆమె డిమాండ్ చేశారు. ఈ వ్యవహారంపై సమగ్ర విచారణ జరిపి దోషులను శిక్షించాలని షర్మిల కోరారు.