ranbir kapoor: భారతీయ చలనచిత్ర చరిత్రలో అఖండ ప్రతిష్టతో ‘రామాయణ’ – రణ్‌బీర్ కపూర్‌కు రూ.150 కోట్ల పారితోషికం
భారతీయ ఇతిహాసం రామాయణం ఆధారంగా బాలీవుడ్‌లో రూపొందుతున్న అత్యంత ప్రతిష్ఠాత్మక చిత్రం ‘రామాయణ’. ‘దంగల్’, ‘ఛిఛోరే’ వంటి విజయవంతమైన చిత్రాలతో పేరు తెచ్చుకున్న నితేశ్ తివారీ ఈ భారీ ప్రాజెక్ట్‌కు దర్శకత్వం వహిస్తున్నారు.
ఈ చిత్రంలో రాముడి పాత్రలో నటిస్తున్న రణ్‌బీర్ కపూర్ రూ.150 కోట్ల భారీ పారితోషికం అందుకుంటున్నారని వార్తలు చక్కర్లు కొడుతున్నాయి. చిత్రం రెండు భాగాలుగా రూపొందుతున్న నేపథ్యంలో, ఒక్కో భాగానికి ఆయన రూ.75 కోట్లు తీసుకుంటున్నట్లు సమాచారం. ఇది ఇప్పటివరకు ఆయన కెరీర్‌లోనే అత్యధిక రెమ్యునరేషన్‌గా చెబుతున్నారు.
సీత పాత్రలో సాయి పల్లవి నటిస్తున్న ఈ చిత్రానికి ఆమెకు రూ.12 కోట్ల వరకు పారితోషికం చెల్లిస్తున్నట్లు సమాచారం. నటీనటుల పారితోషికంతో పాటు సినిమా బడ్జెట్ కూడా అందరినీ ఆశ్చర్యానికి గురిచేస్తోంది.
ఈ ప్రాజెక్ట్‌కి సుమారు రూ.1,600 కోట్ల బడ్జెట్ కేటాయించినట్లు టాలీవుడ్, బాలీవుడ్ వర్గాల్లో వార్తలు వినిపిస్తున్నాయి. ఇందులో మొదటి భాగానికి రూ.900 కోట్లు, రెండో భాగానికి రూ.700 కోట్లు ఖర్చవుతుందని అంచనా.
ఈ చిత్రంలో రావణుడి పాత్రలో కన్నడ స్టార్ యష్ నటించనున్నాడు. యష్ కేవలం నటుడిగా మాత్రమే కాకుండా, సహ నిర్మాతగానూ పనిచేస్తున్నారు. మండోదరి పాత్రకు కాజల్ అగర్వాల్ ఎంపికయ్యే అవకాశాలు ఉన్నట్లు సినీ వర్గాల్లో వినిపిస్తున్న ఊహాగానాలు ఆసక్తికరంగా మారాయి.
సంగీత దర్శకుడిగా ఏఆర్ రెహ్మాన్ బాధ్యతలు చేపట్టడం మరో హైలైట్‌గా నిలుస్తోంది. ప్రస్తుతం చిత్రీకరణ శరవేగంగా కొనసాగుతోంది. మొదటి భాగాన్ని 2026 దీపావళి సందర్భంగా విడుదల చేయాలని, రెండో భాగాన్ని 2027 దీపావళికి తెరపైకి తీసుకురావాలని చిత్ర బృందం లక్ష్యంగా పెట్టుకుంది.
ఈ రీతిలో సాగుతోన్న రామాయణ చిత్రం, ప్రామాణికత, నిర్మాణ విలువలు, స్టార్ కాస్టింగ్ భారతీయ సినిమా చరిత్రలో ఓ మైలురాయిగా నిలవనుంది.