PM Modi: కోట్లాది మంది రామ భక్తుల కల సాకారమైన శుభ సందర్భంలో, అయోధ్యలోని బాలరాముడి ఆలయ శిఖరంపై భారత ప్రధాని నరేంద్ర మోదీ గారు ధ్వజారోహణం చేశారు. ఈ చారిత్రక ఘట్టంతో రామ మందిర నిర్మాణ యజ్ఞానికి పూర్ణాహుతి జరిగిందని ప్రధాని ప్రకటించారు. ఈ సందర్భంగా ఆయన ‘జై శ్రీరామ్’ నినాదంతో తన ప్రసంగాన్ని ప్రారంభించారు. శతాబ్దాలుగా రామభక్తుల్లో ఉన్న బాధ నుంచి, 500 ఏళ్లుగా ఉన్న సమస్య నుంచి నేడు ఉపశమనం లభించిందని ప్రధాని మోదీ భావోద్వేగంతో తెలిపారు. ఆలయ నిర్మాణానికి సహకరించిన ప్రతి ఒక్కరికీ ఈ వేదికగా నమస్కరిస్తున్నట్లు ఆయన పేర్కొన్నారు.
భారతీయ సంస్కృతి పునర్వికాసానికి చిహ్నం
ఈ సందర్భంగా ఆలయ శిఖరంపై ఎగురవేసిన ధర్మధ్వజం కేవలం ఒక జెండా మాత్రమే కాదని, ఇది భారతీయ సంస్కృతి పునర్వికాసానికి, సంకల్పం, సఫలతకు చిహ్నమని ప్రధాని మోదీ అభివర్ణించారు. ఈ ధ్వజంపై ఉన్న కోవిదార్ వృక్షం ఇతిహాసాల వైభవానికి ప్రతీకగా నిలుస్తుందని వివరించారు. ఈ ధర్మధ్వజాన్ని దూరం నుంచి చూసినా రాముడిని చూసినంత పుణ్యం వస్తుందని ప్రధాని మోదీ రామభక్తులకు సందేశమిచ్చారు. అంతేకాక, ఈ జెండా శ్రీరాముడి సిద్ధాంతాలను, కర్మ, కర్తవ్యాల ప్రాముఖ్యతను ప్రపంచానికి చాటుతుందని, ఇది గొప్ప స్ఫూర్తిని, ప్రేరణను ఇస్తుందని ఆయన స్పష్టం చేశారు.
Also Read: Telangana: తెలంగాణ గ్రామ పంచాయతీ ఎన్నికలకు ముహూర్తం ఖరారు.. షెడ్యూల్ నేడు విడుదల
ప్రధాని మోదీ రాముడి గుణగణాలను వివరిస్తూ, ఒక వ్యక్తి పురుషోత్తముడిగా ఎలా ఎదిగారో అయోధ్య చెబుతుందని అన్నారు. రాముడికి కులం, మతం అనే బేధాలు ఉండవని, ఆయన కేవలం భక్తిని మాత్రమే చూస్తారని పేర్కొన్నారు. ఈ స్ఫూర్తితోనే మనం కూడా పేదలు, దుఃఖితులు లేని సమాజాన్ని ఆకాంక్షించాలని ఆయన పిలుపునిచ్చారు.
తన ప్రసంగంలో ప్రధాని మోదీ బానిస భావజాలంపై ఘాటుగా విమర్శించారు. రాముడు ఒక కాల్పనిక వ్యక్తి అని చెప్పే వ్యక్తులకు మన సమాజంలో చోటు ఇవ్వవద్దని కోరారు. ప్రజాస్వామ్యానికి పుట్టినిల్లు భారత్ అని, ఇది శతాబ్దాల క్రితమే తమిళనాడులోని ఉత్తర మేరూర్ శాసనం ద్వారా నిరూపితమైందని తెలిపారు. ప్రతి భారతీయుడి ఇంట్లో, మనసులో రాముడు ఉన్నారని చెప్పారు. మానవ వికాసానికి అయోధ్య ఒక కొత్త నమూనాను ఇస్తుందని, వచ్చే వెయ్యేళ్లపాటు భారత్ తన శక్తిని ప్రపంచానికి చాటాలని ఆకాంక్షించారు.
ఈ ధ్వజారోహణం కార్యక్రమంలో ప్రధాని మోదీతో పాటు ఆర్ఎస్ఎస్ చీఫ్ మోహన్ భగవత్ హాజరయ్యారు. అంతకుముందు ప్రధాని మోదీ, బాలరాముడికి ప్రత్యేక పూజలు నిర్వహించి, శేషావతార మందిరం, మాతా అన్నపూర్ణదేవి ఆలయం, సప్తర్షి మందిరాలను కూడా సందర్శించుకున్నారు. ప్రాణప్రతిష్ట తర్వాత ఇప్పటివరకు దాదాపు 45 కోట్ల మంది భక్తులు రాముడిని దర్శించుకున్నారని ఈ సందర్భంగా వెల్లడైంది.