CM Chandrababu: ఆంధ్రప్రదేశ్ ముఖ్యమంత్రి నారా చంద్రబాబు నాయుడు మంగళగిరిలోని ఏపీఎస్‌పీ బెటాలియన్‍‌లో జరిగిన పోలీసు అమరవీరుల సంస్మరణ దినోత్సవం కార్యక్రమంలో పాల్గొని, అమరులైన పోలీసులకు ఘనంగా నివాళులర్పించారు. ఈ కార్యక్రమంలో హోం శాఖ మంత్రి వంగలపూడి అనిత, డీజీపీ హరీష్ కుమార్ గుప్తా కూడా పాల్గొన్నారు. ఈ సందర్భంగా సీఎం చంద్రబాబు కీలక వ్యాఖ్యలు చేశారు.
1959, అక్టోబర్ 21న చైనా సైనికులతో పోరాడి వీరమరణం పొందిన సీఆర్‌పీఎఫ్ దళాల త్యాగాలను స్మరించుకుంటూ ఈ దినోత్సవం జరుపుకుంటున్నామని, వారి త్యాగాలు మనందరికీ స్ఫూర్తినిస్తాయని ముఖ్యమంత్రి అన్నారు. గత ఏడాది దేశవ్యాప్తంగా 192 మంది పోలీసులు అమరులయ్యారని, ఆంధ్రప్రదేశ్‌లో కూడా ఆరుగురు రోడ్డు ప్రమాదాల్లో మరణించారని ఆయన తెలిపారు.
పెట్టుబడులకు ‘బ్రాండ్ ఏపీ పోలీస్’ ముఖ్యం
ప్రజల రక్షణ కోసం పోలీసులు ప్రాణాలను సైతం పణంగా పెడుతున్నారని, వారి సేవలు అపారమని సీఎం కొనియాడారు. సమాజంలో శాంతిభద్రతలు కఠినంగా ఉంటేనే పెట్టుబడులు వస్తాయని, అందుకే తాను ఈ విషయంలో రాజీ పడబోనని స్పష్టం చేశారు. గూగుల్ వంటి పెద్ద సంస్థలు విశాఖపట్నం (వైజాగ్)లో పెట్టుబడులు పెట్టడానికి రాష్ట్రంలోని శాంతి భద్రతలపట్ల ఉన్న నమ్మకమే కారణమని ఆయన వివరించారు. ఆంధ్రప్రదేశ్ పోలీసులు అంటేనే ఒక బ్రాండ్‌గా దేశవ్యాప్తంగా గుర్తింపు పొందారని, నక్సలిజం, రౌడీయిజం, ఫ్యాక్షనిజం వంటి వాటిపై ఉక్కుపాదం మోపడంలో పోలీసులు సమర్థవంతంగా పనిచేశారని తెలిపారు.
Also Read: Nara Lokesh: ఆస్ట్రేలియాలో 3వ రోజు మంత్రి నారా లోకేష్ పర్యటన
సాంకేతికతతో నేరాల కట్టడి
నేరస్తులు నిరంతరం అప్‌డేట్ అవుతున్నారని, వారి కంటే పోలీసులు కొత్త వెర్షన్‌గా మారి ముందుండాలని సీఎం సూచించారు. సైబర్ నేరాలు, వైట్ కాలర్ నేరాలు పెరుగుతున్న నేపథ్యంలో, పోలీసు శాఖను సాంకేతికంగా బలోపేతం చేయాల్సిన అవసరం ఉందని ఆయన అన్నారు. సీసీ కెమెరాలు, డ్రోన్లు, గూగుల్ టేకౌట్‌ల వంటి అధునాతన సాంకేతికతను ఉపయోగించుకోవాలని చెప్పారు. ప్రస్తుతం రాష్ట్రంలో ప్రతి 55 కిలోమీటర్లకు ఒక సీసీ కెమెరా ఏర్పాటు చేస్తున్నామని, ఇది పోలీసు యంత్రాంగానికి మూడో కన్నులా పనిచేస్తుందని తెలిపారు. నేరాలు చేయాలంటే నేరస్తుల గుండెల్లో రైళ్లు పరుగెత్తే విధంగా పోలీసులు చర్యలు తీసుకోవాలని ఆయన దిశానిర్దేశం చేశారు.
రాజకీయ ముసుగులో నేరాలు, సంక్షేమ కార్యక్రమాలు
కొన్ని రాజకీయ పార్టీలు ఫేక్ ప్రచారాలు చేస్తూ, కుల మత చిచ్చు పెడుతున్నాయని ముఖ్యమంత్రి మండిపడ్డారు. సోషల్ మీడియా పెద్ద సవాలుగా మారిందని, రాజకీయ ముసుగులో కొందరు సమాజంలో అశాంతి సృష్టించడానికి కొత్త నేరాలు చేస్తున్నారని ఆయన ఆరోపించారు. ప్రాణం తాత్కాలికమని, చేసే పనే శాశ్వతమని అన్నారు. రాష్ట్ర పోలీసులకు పూర్తి స్వేచ్ఛ ఇచ్చామని, నేరస్తులు, సంఘవిద్రోహక శక్తుల పట్ల అప్రమత్తంగా ఉండాలని సూచించారు.
పోలీసు సంక్షేమం కోసం తమ ప్రభుత్వం కట్టుబడి ఉందని, పోలీసులకు భీమా, డీఏ, సరెండర్ లీవులు వంటి సంక్షేమ కార్యక్రమాలు అమలు చేస్తున్నామని తెలిపారు. త్వరలో హోమ్ గార్డులకు ఉచిత హెల్త్ ఇన్సూరెన్స్ ఇస్తామని హామీ ఇచ్చారు. గతంలో జరిగిన విధ్వంసాన్ని సరిదిద్ది తమ ప్రభుత్వం పునర్నిర్మాణం చేస్తోందని, ఇప్పటికే 6100 మంది కానిస్టేబుళ్లను నియమించామని వివరించారు. 2047 నాటికి ఆంధ్రప్రదేశ్‌ను దేశంలో నంబర్ 1గా నిలపడానికి పోలీసులు అందించే భద్రత అత్యంత ముఖ్యమని సీఎం ఆకాంక్షించారు.