Nara Lokesh: ఆంధ్రప్రదేశ్‌ను పెట్టుబడులకు స్వర్గధామంగా మార్చే లక్ష్యంతో ఐటీ, ఎలక్ట్రానిక్స్ శాఖ మంత్రి నారా లోకేశ్ ముంబై పర్యటనలో పారిశ్రామిక దిగ్గజాలతో కీలక భేటీలు నిర్వహించారు. ఈ సందర్భంగా ఆయన టాటా గ్రూప్, గ్లోబల్ ట్రేడింగ్ దిగ్గజం ట్రాఫిగురా ఇండియా, అలాగే గ్లోబల్ రియల్ ఎస్టేట్ సంస్థ ఈఎస్ఆర్ గ్రూప్తో చర్చలు జరిపి, రాష్ట్రంలో పెట్టుబడులు పెట్టాల్సిందిగా విజ్ఞప్తి చేశారు.
టాటా గ్రూప్తో భేటీ.. రెన్యూవబుల్ ఎనర్జీపై ఫోకస్
టాటా గ్రూప్ ఛైర్మన్ ఎన్. చంద్రశేఖరన్తో పాటు ఆ సంస్థకు చెందిన ఇతర ప్రముఖులతో లోకేశ్ చర్చలు జరిపారు. ఈ చర్చల్లో ప్రధానంగా పునరుత్పాదక ఇంధన రంగంపై దృష్టి సారించారు.
- టీసీఎస్ సెంటర్ ప్రారంభోత్సవానికి ఆహ్వానం: విశాఖపట్నంలో ఈ నెలలో ప్రారంభించనున్న టీసీఎస్ డెవలప్‌మెంట్ సెంటర్ ప్రారంభోత్సవ కార్యక్రమానికి హాజరుకావాల్సిందిగా చంద్రశేఖరన్‌ను లోకేశ్ ఆహ్వానించారు.
- ఈవీ ఛార్జింగ్, సోలార్: టాటా పవర్ రెన్యూవబుల్స్ ఆధ్వర్యంలో రాష్ట్రవ్యాప్తంగా ఎలక్ట్రిక్ వాహనాల (EV) ఛార్జింగ్ మౌలిక సదుపాయాలను అభివృద్ధి చేసేందుకు ప్రభుత్వంతో భాగస్వామ్యం వహించాలని కోరారు. అలాగే, ఏపీ ప్రజలకు సౌలభ్యంగా ఉండేలా రూఫ్‌టాప్ సోలార్ అభివృద్ధి, రాష్ట్రంలో సెల్, మాడ్యూల్ తయారీ యూనిట్ స్థాపన అవకాశాలను పరిశీలించాలని విజ్ఞప్తి చేశారు.
- టాటా ఆటోకాంప్‌కు విజ్ఞప్తి: టాటా ఆటోకాంప్ ఆధ్వర్యంలో శ్రీసిటీలో ఎలక్ట్రిక్ వాహన భాగాలు మరియు అధునాతన కంపోజిట్ తయారీ యూనిట్లు స్థాపించే అవకాశాలను అన్వేషించాలని కోరారు. ఇందుకు అవసరమైన భూమి, ప్లగ్ అండ్ ప్లే ఇన్‌ఫ్రాస్ట్రక్చర్ను ప్రభుత్వం అందిస్తుందని హామీ ఇచ్చారు.
ఇది కూడా చదవండి: Bihar Elections 2025 Schedule: బిహార్ ఎన్నికల షెడ్యూల్ విడుదల
ట్రాఫిగురాకు పోర్టు ఆధారిత రంగాల్లో ఆహ్వానం
చమురు, ఖనిజాలు, లాజిస్టిక్స్, ఆహార ఉత్పత్తుల ఎగుమతుల్లో ప్రపంచ వాణిజ్య దిగ్గజమైన ట్రాఫిగురా ఇండియా సీఈవో సచిన్ గుప్తాతో మంత్రి లోకేశ్ ప్రత్యేకంగా సమావేశమయ్యారు. 2024-25లో 243.2 బిలియన్ డాలర్ల వ్యాపార కార్యకలాపాలు నిర్వహించిన ఈ సంస్థ.. విశాఖపట్నం పోర్టు నుంచి బొగ్గు, జింక్, అల్యూమినియం వంటి వస్తువులను ఇప్పటికే ఎగుమతి చేస్తోంది.
- వ్యవసాయ ఉత్పత్తులు, కోల్డ్ స్టోరేజి: ట్రాఫిగురా ప్రపంచవ్యాప్తంగా వ్యవసాయ ఉత్పత్తుల వాణిజ్యాన్ని విస్తరిస్తున్న నేపథ్యంలో, ఏపీలో కోల్డ్ స్టోరేజి, ఎగుమతి మౌలిక సదుపాయాల రంగంలో పెట్టుబడులు పెట్టాలని లోకేశ్ ఆహ్వానించారు. భారత్‌లో ఏపీ ప్రధాన బియ్యం ఉత్పత్తిదారు అని, దేశంలో ఉత్పత్తి అయ్యే రొయ్యలలో 70 శాతం ఇక్కడి నుంచే వస్తున్నాయని గుర్తుచేశారు.
- వేర్‌హౌసింగ్, ట్రేడింగ్ డెస్క్: విశాఖపట్నం, కాకినాడ పోర్టుల్లో సరుకు నిల్వలకు అధునాతన వేర్‌హౌసింగ్ సదుపాయాలు ఏర్పాటు చేయాలని కోరారు. విశాఖపట్నం పోర్టు నుంచి ఈ ఏడాది 82.62 మిలియన్ టన్నుల సరుకు రవాణా నమోదైన నేపథ్యంలో… విశాఖలో కమోడిటీ ట్రేడింగ్ డెస్క్ ఏర్పాటు అంశాన్ని పరిశీలించాలని విజ్ఞప్తి చేశారు.
- ఎల్‌ఎన్‌జీ టెర్మినల్: పునరుత్పాదక ఇంధనంలో దూసుకుపోతున్న ఏపీలో విద్యుత్ వాణిజ్యంలో భాగస్వామ్యం వహించాలని, కాకినాడ లేదా విశాఖపట్నంలో ఎల్‌ఎన్‌జీ రీగ్యాసిఫికేషన్ టెర్మినల్‌ను ఏర్పాటుచేసి గ్యాస్ ఆధారిత విద్యుత్ ఉత్పత్తికి సహకరించాలని కోరారు.
ఇది కూడా చదవండి: Pawan Kalyan: రాష్ట్రవ్యాప్త పర్యటనకు డిప్యూటీ సీఎం పవన్ కల్యాణ్ రెడీ.. మొదట కురుపాంకే!
ఈఎస్ఆర్ గ్రూప్తో ఇండస్ట్రియల్ పార్కులపై చర్చ
గ్లోబల్ రియల్ ఎస్టేట్ ఇన్వెస్ట్‌మెంట్ ప్లాట్‌ఫాం అయిన ఈఎస్ఆర్ గ్రూప్ (ESR Group) ఇండియా ఇన్వెస్ట్‌మెంట్స్ హెడ్ సాదత్ షాతో లోకేశ్ సమావేశమయ్యారు.
- లాజిస్టిక్స్ పార్కుల అభివృద్ధి: విజనరీ సీఎం చంద్రబాబు నాయుడు నేతృత్వంలో ఆమోదించిన ప్లగ్ & ప్లే ఇండస్ట్రియల్ పార్క్స్ పాలసీ 4.0 పెట్టుబడులకు ఎంతో అనుకూలంగా ఉందని వివరించారు.
- భాగస్వామ్యం: ఆంధ్రప్రదేశ్ పారిశ్రామిక మౌలిక సదుపాయాల సంస్థ (APIIC)తో కలిసి, విజయనగరం, కాకినాడ, తిరుపతి మార్గాల్లో 1,000 ఎకరాలకు పైగా అభివృద్ధి చేస్తున్న మెగా ఇండస్ట్రియల్ పార్కుల నిర్మాణంలో భాగస్వామ్యం వహించాలని లోకేశ్ కోరారు.
- మల్టీమోడల్ పార్కులు: పోర్టుల సమీపంలో 3-5 పెద్ద లాజిస్టిక్స్ పార్కులను అభివృద్ధి చేయబోతున్నామని, ముఖ్యంగా విశాఖపట్నం, కాకినాడ పోర్టుల వద్ద మల్టీమోడల్ లాజిస్టిక్స్ పార్కులు ఏర్పాటు చేయాలని లోకేశ్ విజ్ఞప్తి చేశారు.