MP Sudha Ramakrishnan: దేశ రాజధాని ఢిల్లీలో చోటు చేసుకున్న ఒక ఘటన ప్రజల భద్రతపై తీవ్ర ఆందోళనలను రేకెత్తిస్తోంది. సాధారణ పౌరులే కాకుండా, ఏకంగా ఓ పార్లమెంట్ సభ్యురాలిపైనే చైన్ స్నాచింగ్ జరిగింది. తమిళనాడులోని మయిలాదుతురై నియోజకవర్గం నుంచి కాంగ్రెస్ ఎంపీగా ప్రాతినిధ్యం వహిస్తున్న సుధా రామకృష్ణన్, ఢిల్లీలో ఉదయం నడక సాగిస్తుండగా అనూహ్యంగా ఆమె మెడలోని బంగారు గొలుసును దొంగలు అపహరించారు.
ఈ సంఘటన సోమవారం తెల్లవారుజామున 6:15-6:20 గంటల మధ్య చాణక్యపురిలోని పోలండ్ ఎంబసీ సమీపంలో జరిగింది. ఎంపీ సుధా రామకృష్ణన్ తన సహచర డీఎంకే నాయకురాలు, పార్లమెంట్ సభ్యురాలు రజతితో కలిసి నడుస్తుండగా, హెల్మెట్ ధరించిన ఒక వ్యక్తి స్కూటీపై వ్యతిరేక దిశలో వచ్చి ఆమె మెడలోని నాలుగు సవర్ల బంగారు గొలుసును లాక్కొని పరారయ్యాడు. ఈ ఘటనలో సుధా మెడకు గాయాలు కావడమే కాకుండా, ఆమె దుస్తులు కూడా పాక్షికంగా చినిగినట్లు తెలిపారు. ఊహించని ఈ పరిణామంతో కిందపడబోయిన ఆమె, వెంటనే నిలదొక్కుకున్నారు.
ఘటన జరిగిన వెంటనే సుధా రామకృష్ణన్ పోలీసులకు ఫిర్యాదు చేశారు. అంతేకాకుండా, కేంద్ర హోంమంత్రి అమిత్ షాకు లేఖ రాశారు. “అత్యంత భద్రత కలిగిన చాణక్యపురి వంటి ప్రాంతంలోనే ఒక మహిళా ఎంపీకి ఇలాంటి పరిస్థితి ఎదురైతే, ఇతర ప్రాంతాల్లో సామాన్య మహిళలు ఎలా సురక్షితంగా తమ పనులను చేసుకోగలరు?” అని ఆమె తన లేఖలో ఆవేదన వ్యక్తం చేశారు. నిందితుడిని త్వరగా గుర్తించి, న్యాయం జరిగేలా చూడాలని ఆమె హోంమంత్రిని కోరారు.
Also Read: Raj Gopal Reddy: తెలంగాణ స‌మాజం స‌హించ‌దు.. రేవంత్ రెడ్డికి ఇచ్చిపడేసిన MLA
ప్రస్తుతం పార్లమెంట్ వర్షాకాల సమావేశాల నిమిత్తం ఢిల్లీలో ఉన్న ఎంపీ సుధాకు ఈ ఘటన తీవ్ర మానసిక క్షోభ కలిగించింది. చాణక్యపురి ప్రాంతం పలు దేశాల దౌత్య కార్యాలయాలు, ప్రభుత్వ భవనాలతో అత్యంత సురక్షితమైనదిగా పరిగణించబడుతుంది. అయినప్పటికీ, దొంగ హెల్మెట్ ధరించి, వేగంగా తప్పించుకోవడంతో పోలీసులు అతడిని గుర్తించేందుకు సీసీటీవీ ఫుటేజీలను పరిశీలిస్తున్నారు. ముఖానికి మాస్క్ ధరించి ఉండటంతో దొంగను సుధా రామకృష్ణన్ గుర్తించలేకపోయారు.
ఇటీవలి కాలంలో చైన్ స్నాచింగ్ కేసులు విపరీతంగా పెరిగిపోతున్నాయి. ద్విచక్ర వాహనాలపై వచ్చి మహిళల మెడలోని బంగారు గొలుసులను దోచుకెళ్లే ముఠాలు రెచ్చిపోతున్నాయి. ఈ తాజా ఘటన, ముఖ్యంగా ఒక పార్లమెంట్ సభ్యురాలిపై జరగడంతో, మహిళల భద్రత, ముఖ్యంగా హై-సెక్యూరిటీ జోన్లలో భద్రతపై ప్రశ్నలు తలెత్తుతున్నాయి. పోలీసులు కేసు నమోదు చేసి దర్యాప్తు కొనసాగిస్తున్నారు.