Kolusu Parthasarathy: ఆంధ్రప్రదేశ్లో కూటమి ప్రభుత్వం పేదల గృహ నిర్మాణ పథకానికి అత్యంత ప్రాధాన్యత ఇస్తోంది. ‘హౌస్ ఫర్ ఆల్’ (అందరికీ ఇల్లు) అనే కాన్సెప్ట్తో ముందుకు వెళుతున్నామని, రాబోయే ఐదేళ్లలో ఏకంగా 15 లక్షల ఇళ్లను పేదలకు అందించాలని లక్ష్యంగా పెట్టుకున్నామని రాష్ట్ర సమాచార శాఖా మంత్రి కొలుసు పార్థసారథి ప్రకటించారు.
ఈ రోజు ఉదయం ఏపీ సచివాలయంలో మీడియాతో మాట్లాడిన మంత్రి పార్థసారథి, గత ప్రభుత్వం గృహనిర్మాణంలో విఫలమైందని తీవ్రంగా విమర్శించారు.
ఉగాదికి మెగా టార్గెట్
మంత్రి కొలుసు పార్థసారథి కూటమి ప్రభుత్వం యొక్క గృహనిర్మాణ ప్రణాళికను వివరిస్తూ కీలక ప్రకటన చేశారు: వచ్చే ఐదేళ్లలో పేదలకు 15 లక్షల ఇళ్లులు పంపిణీ చేయాలని కూటమి ప్రభుత్వం టార్గెట్ పెట్టుకుంది. ఇందులో భాగంగా, వచ్చే ఉగాది పండుగ నాటికి 5 లక్షల ఇళ్లను లబ్ధిదారులకు పంపిణీ చేస్తామని ఆయన హామీ ఇచ్చారు. ఇకపై ప్రతి మూడు నెలలకు ఒకసారి పెద్ద ఎత్తున గృహ ప్రవేశ కార్యక్రమాలను నిర్వహిస్తామని తెలిపారు. ప్రధానమంత్రి ఆవాస్ యోజన (PMAY) కింద గ్రామీణ ప్రాంతాల్లో 5 లక్షల ఇళ్లను పంపిణీ చేయనున్నట్లు చెప్పారు.
ఇది కూడా చదవండి: Akhanda 2: అఖండ 2 టికెట్ రేట్లపై కీలక ప్రకటన?
గత ప్రభుత్వంపై తీవ్ర విమర్శలు
గత వైఎస్సార్సీపీ ప్రభుత్వం గృహనిర్మాణంలో ఘోరంగా విఫలమైందని మంత్రి పార్థసారథి విమర్శించారు. 2019 నుంచి 2024 మధ్య కాలంలో గత ప్రభుత్వం 18 లక్షల ఇళ్లులు మంజూరు చేసినట్లు చెప్పింది. కానీ, వాస్తవంగా కనీసం 4 లక్షల ఇళ్లులు కూడా పూర్తి చేసి లబ్ధిదారులకు అప్పగించలేకపోయింది. కేవలం 16 నెలల్లో 3 లక్షల ఇళ్ల నిర్మాణం పూర్తయిందని వైసీపీ చెప్పుకుంటోంది, కానీ లెక్కలు వేరేలా ఉన్నాయి అని ఆయన అన్నారు.
వ్యవసాయ, పారిశ్రామిక రంగాలకు సమ ప్రాధాన్యత
రాష్ట్రంలో కేవలం గృహనిర్మాణానికే కాక, అన్ని రంగాల అభివృద్ధికి తమ ప్రభుత్వం కట్టుబడి ఉందని మంత్రి స్పష్టం చేశారు.“మా ప్రభుత్వం వ్యవసాయ, పారిశ్రామిక రంగాలను సమ దృష్టితో చూస్తూ పనిచేస్తోంది. ప్రభుత్వ కార్యక్రమాల్లో ప్రజల సంతృప్తిని నిరంతరం పర్యవేక్షిస్తూన్నాం. ఆర్టీజీఎస్ (RTGS) నుంచే నేరుగా రైతుల సమస్యలు, ప్రజల సమస్యలను తెలుసుకుని త్వరితగతిన పరిష్కారంపై దృష్టి పెడుతున్నాం,” అని మంత్రి తెలిపారు.
మొత్తంగా, కూటమి ప్రభుత్వం ‘హౌస్ ఫర్ ఆల్’ నినాదంతో పేదల సొంతింటి కల నెరవేర్చేందుకు యుద్ధ ప్రాతిపదికన ముందుకు సాగుతోందని మంత్రి కొలుసు పార్థసారథి స్పష్టం చేశారు.