కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి మరోసారి తన మంత్రి పదవి ఆశలపై ఆసక్తికర వ్యాఖ్యలు చేశారు. అదృష్టం ఉంటే త్వరలోనే తనకు మంత్రి పదవి లభిస్తుందని ధీమా వ్యక్తం చేశారు. ఇప్పటివరకు ఓపిక పట్టానని, త్వరలోనే మంత్రిగా బాధ్యతలు చేపడతానన్న నమ్మకం వ్యక్తం చేశారు.
రాజగోపాల్ రెడ్డి వ్యాఖ్యలతో తెలంగాణ రాజకీయ వర్గాల్లో మంత్రి పదవి అంశం మళ్లీ చర్చనీయాంశంగా మారింది. గత కొంతకాలంగా మంత్రి పదవిని ఆశిస్తున్న ఆయన, ఈ విషయంపై పలుమార్లు బహిరంగంగానే తన అసహనాన్ని వ్యక్తం చేశారు. కాంగ్రెస్ పార్టీలో చేరే సమయంలో అధిష్ఠానం మంత్రి పదవి ఇస్తామని హామీ ఇచ్చిందని, అయితే ఇప్పటివరకు అది నెరవేరలేదని గతంలో మీడియా సమావేశాల్లో వ్యాఖ్యానించిన విషయం తెలిసిందే.
పార్టీలో జరుగుతున్న పరిణామాలపై కూడా కొన్ని సందర్భాల్లో ఆయన వివాదాస్పద వ్యాఖ్యలు చేశారు. ఎమ్మెల్యేగా తన నియోజకవర్గ అభివృద్ధిపై పూర్తి దృష్టి పెట్టినట్లు చెబుతూ, మంత్రి పదవి లభిస్తే నియోజకవర్గాన్ని మరింత వేగంగా అభివృద్ధి చేయగలనని ఆయన అభిప్రాయపడ్డారు.
అయితే, గతంలో అసంతృప్తితో మాట్లాడిన రాజగోపాల్ రెడ్డి, ఇప్పుడు సానుకూల ధోరణితో వ్యాఖ్యలు చేయడం రాజకీయ వర్గాల్లో ఆసక్తిని రేపుతోంది. అధిష్ఠానం నుంచి మంత్రి పదవిపై ఆయనకు ఏవైనా సానుకూల సంకేతాలు అందాయా? అన్న ఊహాగానాలు జోరుగా వినిపిస్తున్నాయి.