Jubilee Hills By Election: ప్రతిష్ఠాత్మకంగా మారిన జూబ్లీ హిల్స్ ఉపఎన్నిక

సిట్టింగ్ సీటు రక్షణకు బీఆర్ఎస్ బరిలో

రాష్ట్రంలో గత ఎన్నికల్లో వెనుకబడిన బీఆర్ఎస్, జూబ్లీ హిల్స్ ఉపఎన్నికను తమ పునరాగమనం కోసం బంగారు అవకాశంగా చూస్తోంది. ఈ సీటును గెలుచుకుని మళ్లీ తెలంగాణలో తమ బలం చూపించాలని పార్టీ శ్రేణులు కసరత్తు మొదలుపెట్టాయి. “జూబ్లీ హిల్స్‌ నుంచే తిరిగి జైత్రయాత్ర మొదలుపెడతాం” అని పార్టీ నేతలు చెబుతున్నారు.

పార్టీ అధినాయకత్వం కార్యకర్తలకు స్పష్టమైన సందేశం ఇచ్చింది — “ఈ ఎన్నికను ఏ పరిస్థితుల్లోనూ కోల్పోవద్దు” అని. కాంగ్రెస్ ప్రభుత్వానికి తొలి రాజకీయ దెబ్బ ఇవ్వాలన్నది బీఆర్ఎస్ లక్ష్యం.

అధికారంలో ఉన్న కాంగ్రెస్ పూర్తి స్థాయిలో రంగంలోకి

ప్రభుత్వ పక్షం అయిన కాంగ్రెస్ కూడా జూబ్లీ హిల్స్ ఉపఎన్నికను చిన్నచూపు చూడడం లేదు. మంత్రులు, ఎమ్మెల్యేలు, స్థానిక నేతలు ఇప్పటికే నియోజకవర్గంలో బీభత్స ప్రచారాన్ని మొదలుపెట్టారు.

ఇది కూడా చదవండి: Cargo Plane Crashes: హాంకాంగ్‌లో కూలిన విమానం.. ఇద్దరు మృతి.!

ముఖ్యమంత్రి రేవంత్ రెడ్డి కూడా వ్యక్తిగతంగా ఈ ఎన్నికను పర్యవేక్షిస్తున్నారు. ఆయన బీఆర్ఎస్‌పై నిప్పులు చెరుగుతూ – “లోక్‌సభ ఎన్నికల్లో బీజేపీకి సహకరించిన అదే రాజకీయాలు ఇక్కడా పునరావృతం అవుతున్నాయి” అంటూ విమర్శించారు.
కాంగ్రెస్ దృష్టిలో ఇది కేవలం ఉపఎన్నిక కాదు — ప్రజల్లో ప్రభుత్వంపై ఉన్న నమ్మకానికి పరీక్షగా భావిస్తోంది.

గెలుపుపై దృష్టి సారించిన బీజేపీ

అభ్యర్థి ఎంపికలో కొంత ఆలస్యం జరిగినా, జూబ్లీ హిల్స్ గెలుపు అవకాశాన్ని వదులుకోవద్దని పార్టీ శ్రేణులకు స్పష్టమైన దిశానిర్దేశం ఇచ్చింది బీజేపీ. “తెలంగాణలో కాంగ్రెస్‌కు ప్రత్యామ్నాయం మేమే” అనే సందేశాన్ని బలంగా వినిపించడానికి ఇది కీలకమైన ఎన్నికగా బీజేపీ భావిస్తోంది. బీజేపీ అభ్యర్థి లంకల దీపక్ రెడ్డి ఇప్పటికే విస్తృత ప్రచారాన్ని ప్రారంభించారు. యువత, మధ్యతరగతి ఓటర్లను ఆకర్షించే విధంగా ప్రచారం సాగుతోంది.

ప్రజా అభిప్రాయం – ఎవరి వైపు మొగ్గు?

మూడు పార్టీలూ జూబ్లీ హిల్స్ వీధులన్నింటిలో ప్రచారాన్ని వేగవంతం చేశాయి. అయితే ప్రజల మనసు ఎవరి వైపుంది అన్నది స్పష్టంగా తెలియడంలేదు.

పండుగల తర్వాత ప్రచారం మరింత వేడెక్కేలా కనిపిస్తోంది. చివరి వారంలో పెద్ద నేతల ర్యాలీలు, రోడ్ షోలు, ప్రచార యుద్ధం తారస్థాయికి చేరనున్నాయి.