Jubilee Hills By Poll: జూబ్లీహిల్స్ శాసనసభ ఉప ఎన్నిక పోలింగ్ ఈ రోజు (మంగళవారం) ఉదయం 7 గంటలకు ప్రారంభమైంది. సాయంత్రం 6 గంటల వరకు ఓటర్లు తమ ఓటు హక్కును వినియోగించుకోవచ్చు. మొత్తం 58 మంది అభ్యర్థులు తమ అదృష్టాన్ని పరీక్షించుకుంటున్న ఈ ఎన్నికల్లో, ఓటర్లు ఉదయం నుంచే తమ ఉత్సాహాన్ని చూపుతున్నారు.
నియోజకవర్గం మరియు పోలింగ్ వివరాలు
ఈ నియోజకవర్గంలో 4,01,365 మంది ఓటర్లు ఉన్నారు. వీరిలో పురుషులు 2,08,561, మహిళలు 1,92,779, మరియు ఇతరులు 25 మంది ఉన్నారు. ఎన్నికల కమిషన్ మొత్తం 407 పోలింగ్ స్టేషన్లు ఏర్పాటు చేసింది. దాదాపు 5,000 మంది సిబ్బంది ఎన్నికల విధుల్లో పాల్గొంటున్నారు. హైదరాబాద్ సిటీ పోలీస్‌తో పాటు అదనంగా 800 మంది కేంద్ర పోలీస్ బలగాలను మోహరించి భద్రతను కట్టుదిట్టం చేశారు.
ఇది కూడా చదవండి: Private Bus Fire Accident: 40 మంది ప్రయాణికులు.. హైదరాబాద్-విజయవాడ రహదారిపై బస్సు దగ్ధం
ఎదురైన సాంకేతిక లోపాలు
పోలింగ్ ప్రారంభమైన కొద్దిసేపటికే కొన్ని పోలింగ్ బూత్‌లలో ఈవీఎంలు మొరాయించాయి.షేక్‌పేట డివిజన్‌లోని పోలింగ్ బూత్ 30లో ఈవీఎంలో సాంకేతిక లోపం తలెత్తింది. రహమత్ నగర్‌ డివిజన్‌లోని 165, 166 పోలింగ్ బూత్‌లలో కూడా ఈవీఎంలు మొరాయించాయి.
ఈవీఎంలు పనిచేయకపోవడంతో ఓటర్లు క్యూలైన్లలో వేచి చూడాల్సిన పరిస్థితి ఏర్పడింది. సమస్యను వెంటనే పరిష్కరించేందుకు అధికారులు చర్యలు చేపట్టారు. ఎన్నికల కమిషన్ ఈవీఎంల బ్యాకప్‌ను కూడా అందుబాటులో ఉంచింది.
ఓటు వేసిన బీఆర్ఎస్ అభ్యర్థి
పోలింగ్ కొనసాగుతుండగా, బీఆర్ఎస్ అభ్యర్థి మాగంటి సునీత తమ ఓటు హక్కును వినియోగించుకున్నారు. ఆమె నవోదయ కాలనీ పోలింగ్ బూత్‌లో తన పిల్లలతో కలిసి ఓటు వేశారు.
మిగిలిన అభ్యర్థులు, ప్రముఖులు కూడా త్వరలో తమ ఓటు హక్కును వినియోగించుకోనున్నారు. పోలింగ్ సాయంత్రం 6 గంటల వరకు కొనసాగనుంది.