Iran: ఇజ్రాయెల్, ఇరాన్ మధ్య 12 రోజులుగా జరుగుతున్న ఘర్షణలు ముగియనున్నాయని అమెరికా అధ్యక్షుడు డొనాల్డ్ ట్రంప్ చేసిన ప్రకటనపై ఇరాన్ భిన్నంగా స్పందించింది. తొలుత ట్రంప్ ప్రకటనను కొట్టిపారేసిన ఇరాన్, ఆ తర్వాత మాత్రం కాల్పుల విరమణకు సుముఖంగా ఉన్నట్లు సంకేతాలివ్వడం గమనార్హం. ట్రంప్ తన ‘ట్రూత్ సోషల్’ ఖాతాలో కాల్పుల విరమణ గురించి పోస్ట్ చేసిన కొన్ని గంటల తర్వాత, ఇరాన్ విదేశాంగ శాఖ మంత్రి అబ్బాస్ అరాగ్చీ మంగళవారం రెండు వేర్వేరు పోస్టులు చేశారు.
అరాగ్చీ తన మొదటి పోస్ట్‌లో, “ఇజ్రాయెల్లే తొలుత మాపై యుద్ధం ప్రారంభించింది. ఈ విషయాన్ని మేము ఇప్పటికే స్పష్టం చేశాం. ప్రస్తుతానికి కాల్పుల విరమణ, సైనిక కార్యకలాపాల విరమణపై ఎలాంటి ఒప్పందం లేదు” అని ఖండించారు. అయితే, “టెల్ అవీవ్ (ఇజ్రాయెల్) మా ప్రజలపై చేస్తున్న దురాక్రమణను మంగళవారం ఉదయం 4 గంటల్లోపు (టెహ్రాన్ కాలమానం ప్రకారం) ఆపేయాలి. ఈ సంఘర్షణలను కొనసాగించాలనే ఉద్దేశం మాకు లేదు. మా సైనిక కార్యకలాపాల విరమణపై తుది నిర్ణయం తర్వాత ప్రకటిస్తాం” అని పేర్కొన్నారు. ఇది ఒక రకంగా ఇజ్రాయెల్‌కు హెచ్చరిక, తమ ఉద్దేశాన్ని వెల్లడించడం కూడా.
Also Read: Shubhanshu Shukla: జూన్ 25న శుభాంశు శుక్లా రోదసియాత్ర.. నాసా ప్రకటన!
Iran: కానీ, కొద్దిసేపటికే అరాగ్చీ మరో పోస్ట్ చేశారు. అందులో టెల్ అవీవ్‌పై తమ సైనిక కార్యకలాపాలు ముగిశాయని అర్థం వచ్చేలా పేర్కొన్నారు. “ఇజ్రాయెల్ దురాక్రమణకు వ్యతిరేకంగా తమ సాయుధ దళాలు చివరివరకు శక్తిమంతమైన పోరాటం కొనసాగించాయి” అని అరాగ్చీ తెలిపారు. దేశాన్ని కాపాడేందుకు, శత్రువుల దాడికి చివరి నిమిషం వరకు స్పందించిన దళాలకు ఆయన కృతజ్ఞతలు తెలిపారు. ఈ పోస్ట్‌తో, ఇజ్రాయెల్‌తో కాల్పుల విరమణ ఒప్పందానికి తాము సిద్ధమేనని ఇరాన్ పరోక్షంగా సంకేతాలిచ్చినట్లైంది.
ట్రంప్ తన ట్రూత్ సోషల్ వేదికగా ఇజ్రాయెల్, ఇరాన్‌లు పూర్తి కాల్పుల విరమణకు అంగీకరించాయని, 12 గంటల్లో యుద్ధం అధికారికంగా ముగుస్తుందని ప్రకటించారు. అయితే, ట్రంప్ ప్రకటనకు విరుద్ధంగా ఇరాన్ తొలుత స్పందించడం గమనార్హం. ఈ విషయంలో ఇజ్రాయెల్ ఇప్పటివరకు ఎలాంటి అధికారిక ప్రకటన చేయకపోవడం సందిగ్ధతను మరింత పెంచుతోంది. ఈ పరిణామాలు పశ్చిమాసియాలో శాంతి ప్రక్రియపై మరింత స్పష్టత రావాల్సిన అవసరాన్ని సూచిస్తున్నాయి.