Harish Rao: తెలంగాణ కాంగ్రెస్ ప్రభుత్వం, ముఖ్యంగా కేబినెట్ తీరుపై మాజీ మంత్రి, బీఆర్‌ఎస్ సీనియర్ నేత హరీష్‌రావు తీవ్రస్థాయిలో విరుచుకుపడ్డారు. ముఖ్యమంత్రి కేసీఆర్‌ నీటి వాటాల కోసం పోరాడితే, ఇప్పుడు కాంగ్రెస్ నేతలు మాత్రం వసూళ్లలో వాటాల కోసం కొట్టుకుంటున్నారని ఆయన ధ్వజమెత్తారు. రాష్ట్ర కేబినెట్ తీరు ‘దండుపాళ్యం ముఠా’ను తలపిస్తోందని సంచలన వ్యాఖ్యలు చేశారు.
వసూళ్ల కోసమే కాంగ్రెస్ నేతల పోరు
కేసీఆర్‌గారు ముఖ్యమంత్రిగా ఉన్నప్పుడు తెలంగాణకు రావాల్సిన నీటి వాటాల కోసం కేంద్రంతో, ఇతర రాష్ట్రాలతో పోరాడి సాధించారని హరీష్‌రావు గుర్తు చేశారు. కానీ, ఇప్పుడు కాంగ్రెస్ నేతలు మాత్రం ‘వసూళ్ల’లో వాటాల కోసం ఒకరితో ఒకరు పోట్లాడుకుంటున్నారని ఆరోపించారు. మంత్రులు తమ తమ శాఖల్లో అవినీతికి పాల్పడుతూ, ఆ సొమ్ము పంపకాల కోసమే అంతర్గతంగా గొడవ పడుతున్నారని ఆయన విమర్శించారు.
మంత్రులు తిట్టుకోవడానికే కేబినెట్ భేటీ
తెలంగాణ కేబినెట్ సమావేశాలు ప్రజా సమస్యల గురించి చర్చించడానికి కాకుండా, మంత్రులు ఒకరినొకరు తిట్టుకోవడానికే వాడుకుంటున్నారని హరీష్‌రావు ఎద్దేవా చేశారు. కేబినెట్ పూర్తిగా గ్రూపులుగా విడిపోయిందని, ప్రభుత్వంలో సమన్వయం పూర్తిగా లోపించిందని ఆయన అన్నారు. దీని కారణంగా పాలన గాడి తప్పి, అభివృద్ధి ఆగిపోయిందని ఆందోళన వ్యక్తం చేశారు.
Also Read: Beetroot Juice: బీట్‌రూట్ జ్యూస్ రోజూ తాగితే ఈ 5 గొప్ప లాభాలు మీ సొంతం!
రేవంత్‌రెడ్డి హయాంలో ‘గన్ కల్చర్’
తెలంగాణ ముఖ్యమంత్రి రేవంత్‌రెడ్డి రాష్ట్రంలో ‘గన్ కల్చర్’ (తుపాకుల సంస్కృతి)ను తీసుకొచ్చారని హరీష్‌రావు మరో సంచలన ఆరోపణ చేశారు. దీనికి నిదర్శనంగా, మంత్రి కొండా సురేఖ కుమార్తె చేసిన ఆరోపణలను ఆయన ప్రస్తావించారు.
“రేవంత్ రెడ్డి సన్నిహితులు తుపాకీ పెట్టి బెదిరించినట్టు” మంత్రి కొండా సురేఖ కూతురు బహిరంగంగా ఆరోపించారని హరీష్‌రావు గుర్తుచేశారు. ఒక సిట్టింగ్ మంత్రి కూతురే ఇలాంటి ఆరోపణలు చేశారంటే, రాష్ట్రంలో పరిస్థితి ఎంత దారుణంగా ఉందో అర్థం చేసుకోవచ్చని అన్నారు. ఈ తుపాకీ బెదిరింపుల వ్యవహారంపై తక్షణమే న్యాయ విచారణ జరిపించాలని ఆయన ప్రభుత్వాన్ని డిమాండ్ చేశారు.
అతి తక్కువ పెట్టుబడులు కాంగ్రెస్ హయాంలోనే
రాష్ట్రానికి వచ్చే పెట్టుబడుల విషయంలోనూ కాంగ్రెస్ ప్రభుత్వంపై హరీష్‌రావు విమర్శనాస్త్రాలు సంధించారు. కాంగ్రెస్ హయాంలోనే తెలంగాణకు అతి తక్కువ పెట్టుబడులు వచ్చాయని గణాంకాలతో సహా ఆరోపించారు. బీఆర్‌ఎస్ హయాంలో ప్రపంచ స్థాయి కంపెనీలు తరలివచ్చాయని, కానీ కాంగ్రెస్ అధికారంలోకి వచ్చాక ఆ పరిస్థితి మారిపోయిందని ఆవేదన వ్యక్తం చేశారు. ప్రభుత్వం అనుసరిస్తున్న తప్పుడు విధానాల వల్లే రాష్ట్రం ఆర్థికంగా వెనుకబడుతోందని ఆయన అన్నారు.