Gurudev Sri Sri Ravi Shankar: ప్రపంచ శాంతి, మానవతా విలువలకు పెద్దపీట వేస్తూ నిరంతరం కృషి చేస్తున్న గురుదేవ్ శ్రీశ్రీ రవిశంకర్ (Sri Sri Ravi Shankar) గారికి అమెరికాలో ఒక అరుదైన గౌరవం దక్కింది. ఆయన సమాజానికి అందిస్తున్న విశేష సేవలను గుర్తిస్తూ, అమెరికాలోని రెండు ముఖ్య నగరాలు ఆయన పేరు మీద ప్రత్యేక దినోత్సవాలను ప్రకటించాయి.
‘శ్రీశ్రీ రవిశంకర్ దినోత్సవం’ ప్రకటన
గురుదేవ్ సేవలకు గుర్తింపుగా, అమెరికాలోని సియాటెల్ నగరం అక్టోబర్ 19వ తేదీని ‘శ్రీశ్రీ రవిశంకర్ దినోత్సవం’గా అధికారికంగా ప్రకటించింది. అలాగే, మరో ప్రధాన నగరం వాంకోవర్ కూడా అక్టోబర్ 18వ తేదీని గురుదేవ్ శ్రీశ్రీ రవిశంకర్ దినోత్సవంగా ప్రకటించి ఆయనకు ఘనమైన గౌరవాన్ని అందించింది.
శాంతి, సేవా కార్యక్రమాలకు గుర్తింపు
ప్రపంచవ్యాప్తంగా మానసిక ఒత్తిడి, హింస లేని సమాజాన్ని నెలకొల్పడం, వివిధ మతాల మధ్య స్నేహం, సామరస్యాన్ని పెంచడం కోసం గురుదేవ్ చేస్తున్న కృషికి ఈ గౌరవం లభించింది.
ఈ సందర్భంగా సియాటెల్ మేయర్ బ్రూస్ హారెల్ మరియు వాంకోవర్ మేయర్ కెన్ సిమ్ మాట్లాడుతూ.. ఒత్తిడి, హింస లేని ప్రపంచాన్ని సృష్టించాలనే గురుదేవ్ గారి లక్ష్యం దాదాపు 180 దేశాల్లో 8 కోట్లకు పైగా ప్రజలను ప్రభావితం చేసిందని తెలియజేశారు.
‘ఆర్ట్ ఆఫ్ లివింగ్’ సేవలు
శ్రీశ్రీ రవిశంకర్ స్థాపించిన ఆర్ట్ ఆఫ్ లివింగ్ (Art of Living) సంస్థ ద్వారా అనేక రకాల సేవా కార్యక్రమాలు జరుగుతున్నాయి. ఈ సంస్థ నిర్వహిస్తున్న ఒత్తిడిని దూరం చేసే కార్యక్రమాలు, యువతలో నాయకత్వ లక్షణాలను పెంచే శిబిరాలు, సామాజిక అభివృద్ధి, మరియు సేవా పనుల వల్ల ప్రజల్లో మానసిక ధైర్యం, ఆరోగ్యం పెరిగాయని మేయర్లు ప్రశంసించారు. అంతేకాక, ఈ కార్యక్రమాలు సమాజంలో గొడవలు తగ్గించడానికి, శాంతియుత వాతావరణాన్ని నెలకొల్పడానికి, మరియు ముఖ్యంగా మహిళా సాధికారికతను పెంచడానికి ఎంతో తోడ్పడ్డాయని వివరించారు.