Delhi: దేశీయ విమానయాన నియంత్రణ సంస్థ డైరెక్టరేట్ జనరల్ ఆఫ్ సివిల్ ఏవియేషన్ (DGCA), ఎయిర్ ఇండియాపై కీలక చర్యలు తీసుకుంది. విమానయాన భద్రతా ప్రోటోకాల్‌లను గణనీయంగా ఉల్లంఘించిందని ఆరోపణల నేపథ్యంలో, సిబ్బంది షెడ్యూలింగ్ విభాగానికి చెందిన ముగ్గురు సీనియర్ అధికారులను తక్షణమే బాధ్యతల నుంచి తప్పించాలంటూ ఆదేశించింది.
తొలగించాల్సిన అధికారులుగా చురా సింగ్ (డివిజనల్ వైస్ ప్రెసిడెంట్), పింకీ మిట్టల్ (చీఫ్ మేనేజర్ – క్రూ షెడ్యూలింగ్), పాయల్ అరోరా (క్రూ షెడ్యూలింగ్ – ప్లానింగ్) ఉన్నారు. ఈ ముగ్గురిని వెంటనే క్రూ షెడ్యూలింగ్ బాధ్యతల నుంచి తీసివేయాలని DGCA స్పష్టం చేసింది.
ఈ చర్యలు భద్రతా ప్రమాణాల పట్ల విరుద్ధంగా పనిచేసిన అధికారులపై నిర్దాక్షిణ్యంగా వ్యవహరిస్తామనే సంకేతంగా అధికారులు భావిస్తున్నారు. సిబ్బంది షెడ్యూలింగ్‌లో జరిగిన లోపాల వల్ల విమాన సేవల సమయపాలనపై ప్రభావం పడటమే కాకుండా, పైలట్లు, క్రూ సభ్యుల పనిభారంపై అనవసర ఒత్తిడిని కలిగించిందని DGCA అభిప్రాయపడింది.
ఎయిర్ ఇండియా ఇప్పటికే దీనిపై అంతర్గత విచారణ ప్రారంభించినట్లు సమాచారం. భవిష్యత్తులో ఇటువంటి ఘటనలు పునరావృతం కాకుండా చర్యలు తీసుకుంటామని ఎయిర్ ఇండియా ప్రతినిధులు పేర్కొన్నారు.