Jailer 2: సూపర్ స్టార్ రజినీకాంత్ నటించిన బ్లాక్‌బస్టర్ చిత్రం ‘జైలర్’ సీక్వెల్‌ రూపొందుతోంది. దర్శకుడు నెల్సన్ దిలీప్ కుమార్ తెరకెక్కిస్తున్న ఈ చిత్రం తమిళంతో పాటు తెలుగు, ఓవర్సీస్ మార్కెట్లలో భారీ విజయం సాధించింది. ‘జైలర్ 2’లో స్టార్ కాస్ట్‌తో పాటు మరోసారి సంచలన నటుడు వినాయకన్ కనిపించనున్నాడని సమాచారం. మొదటి భాగంలో విలన్‌గా అద్భుత నటనతో ఆకట్టుకున్న వినాయకన్, ఈ సీక్వెల్‌లో కీలక పాత్రలో కనిపించనున్నాడు.
మొదటి భాగంలో అతని పాత్ర ముగిసినప్పటికీ, ‘జైలర్ 2’లో ఫ్లాష్‌బ్యాక్ సన్నివేశాల్లో వినాయకన్ నటిస్తున్నట్లు తెలుస్తోంది. కేవలం రెండు రోజుల షూటింగ్‌లో పాల్గొన్న అతను, తన పాత్రతో మరోసారి ప్రేక్షకులను ఆకట్టుకోనున్నాడు. అయితే, ఈ చిత్రం గురించి మరింత సమాచారం వెల్లడికావాల్సి ఉంది. ఇటీవల వినాయకన్‌పై వివాదాలు చుట్టుముట్టినప్పటికీ, అతని నటనపై అంచనాలు మాత్రం ఆకాశాన్ని తాకుతున్నాయి. మరి ‘జైలర్ 2’ రజినీ అభిమానులకు మరో విజయంగా నిలుస్తుందా? వేచి చూడాలి!