CM Revanth Reddy: ముఖ్యమంత్రి ఎ. రేవంత్‌రెడ్డి ఈరోజు (సోమవారం) నాగర్‌కర్నూల్‌ జిల్లాలో పర్యటించి కీలకమైన రెండు కార్యక్రమాలలో పాల్గొననున్నారు. ఈ పర్యటనలో ఆయన నీటిపారుదల రంగానికి సంబంధించిన శ్రీశైలం ఎడమ గట్టు కాల్వ (SLBC) సొరంగం పనులను పునరుద్ధరించేందుకు జరుగుతున్న వైమానిక సర్వేను (ఏరియల్ సర్వే) ప్రత్యేకంగా పర్యవేక్షించనున్నారు.
ఎస్ఎల్బీసీ పనుల పర్యవేక్షణ
సీఎం రేవంత్‌రెడ్డి, నీటిపారుదల శాఖ మంత్రి ఉత్తమ్‌కుమార్‌రెడ్డి, మంత్రి జూపల్లి కృష్ణారావుతో కలిసి మధ్యాహ్నం 1 గంటకు హెలికాప్టర్‌లో అచ్చంపేట మండలం మన్నేవారిపల్లికి చేరుకుంటారు. గత ఫిబ్రవరిలో ఎస్ఎల్బీసీ సొరంగం కూలిపోయి కార్మికులు ప్రాణాలు కోల్పోవడం, యంత్రాలు దెబ్బతినడం వంటి దురదృష్టకర సంఘటనల నేపథ్యంలో, సొరంగం తవ్వకాలను అత్యంత సురక్షితంగా మళ్లీ ప్రారంభించేందుకు ప్రభుత్వం ఈ నిర్ణయం తీసుకుంది.
మాగ్నెటిక్ జియోఫిజికల్ సర్వే: ఈ పునరుద్ధరణ పనులలో భాగంగా, నేషనల్‌ జియోఫిజికల్ ఇన్‌స్టిట్యూట్‌ (NGRI) శాస్త్రవేత్తల బృందం ‘మాగ్నెటిక్ జియోఫిజికల్ సర్వే’ను ప్రారంభిస్తుంది. ఈ సర్వేలో హెలికాప్టర్ దాదాపు 200 కి.మీ. మేర ప్రయాణిస్తూ, సొరంగం తవ్వాల్సిన ప్రాంతంలో భూగర్భంలో 800 నుంచి 1000 మీటర్ల లోతు వరకు ఎలాంటి పరిస్థితులు ఉన్నాయో పరిశీలిస్తుంది.
Also Read: Road Accident: రంగారెడ్డి జిల్లాలో ఘోర రోడ్డు ప్రమాదం.. 17 మంది మృతి
ప్రత్యక్ష పర్యవేక్షణ: ముఖ్యమంత్రి, మంత్రులు సర్వే జరిపే హెలికాప్టర్‌కు సమాంతరంగా మరో హెలికాప్టర్‌లో ప్రయాణిస్తూ, ఈ కీలకమైన సర్వే ప్రక్రియను ప్రత్యక్షంగా పరిశీలించనున్నారు.
పనుల స్థితి: ఎస్‌ఎల్‌బీసీలోని రెండు సొరంగాల్లో ఒకటో సొరంగంలో మొత్తం 43.93 కి.మీ. తవ్వాల్సి ఉండగా, ఇంకా 9.8 కి.మీ. మేర తవ్వకాలు మిగిలి ఉన్నాయి. ఈ సర్వే పూర్తయిన తర్వాత సొరంగం తవ్వకానికి ఇతర మార్గాలు లేదా పూర్తి చేయాల్సిన మార్గాలు తెలుస్తాయి.
యంగ్ ఇండియా స్కూల్‌కు శంకుస్థాపన
ఎస్ఎల్బీసీ పనుల పరిశీలనకు ముందు, ముఖ్యమంత్రి కొల్లాపూర్‌ నియోజకవర్గం, పెంట్లవెల్లి మండలం జటప్రోల్‌లో పర్యటిస్తారు. మొదటగా, గ్రామంలోని పురాతన మదనగోపాలస్వామి ఆలయంలో ఆయన ప్రత్యేక పూజలు నిర్వహిస్తారు. అనంతరం, రూ. 150 కోట్లతో 22 ఎకరాల విస్తీర్ణంలో ఏర్పాటు చేయనున్న యంగ్ ఇండియా ఇంటిగ్రేటెడ్‌ స్కూల్‌ భవన నిర్మాణానికి శంకుస్థాపన చేస్తారు. శంకుస్థాపన కార్యక్రమం తర్వాత ఏర్పాటు చేసిన భారీ బహిరంగ సభలో పాల్గొని, ఇందిరా మహిళాశక్తి పథకం కింద స్వయం సహాయక బృందాల (SHG) మహిళలకు వడ్డీలేని రుణాలను పంపిణీ చేయనున్నారు. ముఖ్యమంత్రి పర్యటన సందర్భంగా జిల్లాలో పోలీసులు పటిష్టమైన భద్రతా ఏర్పాట్లు చేశారు. ఈ పర్యటన ద్వారా జిల్లాలోని విద్య, సామాజిక, నీటిపారుదల రంగాలకు ప్రాధాన్యత లభించనుంది.