Cm chandrababu: ఆంధ్రప్రదేశ్‌ను ఇంధన స్వావలంబిత రాష్ట్రంగా తీర్చిదిద్దేందుకు, అలాగే విశాఖపట్నాన్ని దేశంలోని ప్రముఖ ఆర్థిక కేంద్రాల్లో ఒకటిగా అభివృద్ధి చేయడానికి రాష్ట్ర ప్రభుత్వం ప్రత్యేక కృషి చేస్తున్నది. ఈ దిశగా ముఖ్యమంత్రి చంద్రబాబు నాయుడు నేతృత్వంలో, రాష్ట్ర సచివాలయంలో నీతి ఆయోగ్ ప్రతినిధులు మరియు ఉన్నతాధికారులతో ఒక కీలక సమీక్ష సమావేశం జరిగింది.
ఈ సమావేశంలో, రాష్ట్ర ఇంధన పరివర్తన ప్రణాళిక (State Energy Transition Roadmap)పై ప్రభుత్వానికి, నీతి ఆయోగ్‌కు, ISEG ఫౌండేషన్‌కు మధ్య అవగాహన ఒప్పందం కుదిరింది.
విద్యుత్ రంగంలో మార్పుల దిశగా అడుగులు
చంద్రబాబు నాయుడు మాట్లాడుతూ, గతంలో రాష్ట్రం చేపట్టిన విద్యుత్ రంగ సంస్కరణలను గుర్తు చేశారు. “1998లోనే ఏపీ దేశంలో మొదటిగా విద్యుత్ సంస్కరణలు చేపట్టింది. 2014 తర్వాత పునరుత్పాదక ఇంధనంపై ప్రత్యేక దృష్టి సారించాం. ఇది చవకైన విద్యుత్ ఉత్పత్తికి దోహదం చేసింది. సాంకేతికతను వినియోగించి విద్యుత్ రంగంలో అద్భుతమైన పురోగతి సాధించాం” అని చెప్పారు.
ప్రజలే ఇకపై విద్యుత్ ఉత్పత్తిదారులూ, వినియోగదారులూ కావాలని, నష్టాలు తగ్గించే విధంగా విధానాలు రూపొందిస్తున్నామని చెప్పారు. ఎలక్ట్రిక్ వాహనాల వినియోగం పెరిగితే రవాణా ఖర్చులు తగ్గుతాయని ఆయన అభిప్రాయం వ్యక్తం చేశారు.
పునరుత్పాదక ఇంధనానికి పెద్ద పీట
సౌర, పవన విద్యుత్తు గానే కాకుండా, పంప్డ్ ఎనర్జీ, బ్యాటరీ ఎనర్జీ, గ్రీన్ హైడ్రోజన్ వంటి శుద్ధ ఇంధన రూపాల అభివృద్ధికి రాష్ట్రం కృషి చేస్తోందని సీఎం చెప్పారు. దీనికోసం అవసరమైన వనరులు రాష్ట్రంలో ఇప్పటికే ఉన్నాయని తెలిపారు. ఈ లక్ష్య సాధనలో నీతి ఆయోగ్ సహకారం కీలకం అని ఆయన స్పష్టం చేశారు.
విద్యుత్ డిమాండ్ పెరుగుతోంది
ప్రస్తుతం రాష్ట్ర విద్యుత్ ఉత్పత్తి సామర్థ్యం 27.3 గిగావాట్లు. 2019లో విద్యుత్ డిమాండ్ 55.6 బిలియన్ యూనిట్లుగా ఉండగా, 2025 నాటికి ఇది 69.7 బిలియన్ యూనిట్లు దాటింది. పారిశ్రామిక రంగానికి 4.8%, గృహ వినియోగానికి 5.1% డిమాండ్ పెరిగింది. 2035 నాటికి ఇది 163.9 బిలియన్ యూనిట్లకు చేరుతుందని అంచనా.
భారీ లక్ష్యాలు, పెట్టుబడులు
AP ఇంటిగ్రేటెడ్ క్లీన్ ఎనర్జీ పాలసీ కింద, రాష్ట్రం 2029 నాటికి ఈ విధంగా లక్ష్యాలు నిర్ణయించింది:
78.5 గిగావాట్ల సౌర విద్యుత్
35 గిగావాట్ల పవన విద్యుత్
22 గిగావాట్ల పంప్డ్ స్టోరేజ్
25 గిగావాట్ల బ్యాటరీ స్టోరేజ్
1.5 MTPA గ్రీన్ హైడ్రోజన్
1500 KL/Day ఇథనాల్
5000 EV ఛార్జింగ్ స్టేషన్లు
10,000 TPD బయో CNG ఉత్పత్తి
ఇప్పటివరకు రాష్ట్రం క్లీన్ ఎనర్జీ రంగంలో ₹5.78 లక్షల కోట్ల పెట్టుబడులను ఆకర్షించిందని, దీని ద్వారా అదనంగా 57.7 గిగావాట్ల విద్యుత్ ఉత్పత్తి సాధ్యమవుతుందని అధికారులు తెలిపారు.
ఈ సమీక్షలో విద్యుత్ శాఖ మంత్రి గొట్టిపాటి రవికుమార్, నీతి ఆయోగ్ సీఈఓ బీవీఆర్ సుబ్రమణ్యం, ప్రభుత్వ ప్రధాన కార్యదర్శి విజయానంద్, ఇతర ఉన్నతాధికారులు పాల్గొన్నారు. ఈ ప్రణాళికలు రాష్ట్రానికి ఇంధన స్వావలంబన తెచ్చే దిశగా, అలాగే విశాఖపట్నంను ఆర్థిక కేంద్రంగా తీర్చిదిద్దే దిశగా కీలకంగా నిలవనున్నాయని ప్రభుత్వం తెలిపింది.