Chiranjeevi: టాలీవుడ్‌లో ఇప్పుడు రీ-రిలీజ్‌ల పర్వం నడుస్తోంది. ఒకప్పుడు థియేటర్లను ఊపిన క్లాసిక్ మాస్ మాస్టర్‌పీస్‌లు మళ్లీ తెరపైకి వస్తూ, నాస్టాల్జియాను కలెక్షన్ల కరెన్సీగా మారుస్తున్నాయి. ఈ ట్రెండ్‌లో ముందుండి నడిపిస్తున్నది ఎవరో కాదు… మెగాస్టార్ చిరంజీవి! ‘జగదేక వీరుడు అతిలోకసుందరి’, ‘గ్యాంగ్ లీడర్’ వంటి పాత బ్లాక్‌బస్టర్‌లు ఇప్పటికే రీ-రిలీజై, నేటి జనరేషన్‌ను సైతం ఆశ్చర్యంలో ముంచెత్తాయి. ఇప్పుడు అదే పరంపరలో, మెగాస్టార్ కెరీర్‌లోనే ఒక మైలురాయిగా నిలిచిన ‘కొదమసింహం’ (1990) సినిమా, ఏకంగా 35 ఏళ్ల తర్వాత ఈ నెల 21న రీ-రిలీజ్ అయ్యేందుకు సిద్ధమైంది.
టాలీవుడ్‌లో అరుదైన కౌబాయ్ సంచలనం
150కి పైగా చిత్రాల్లో నటించిన చిరంజీవి కెరీర్‌లో, ‘కొదమసింహం’ ఒక ప్రత్యేక అధ్యాయం. కృష్ణ గారి ‘మోసగాళ్లకు మోసగాడు’ (1971) తర్వాత తెలుగులో వచ్చిన మరో సంచలన కౌబాయ్ యాక్షన్ చిత్రంగా దీనికి గుర్తింపు ఉంది. విడుదల సమయంలో ఈ చిత్రం భారీ విజయాన్ని సాధించింది. అప్పట్లో ₹10 కోట్లకు పైగా కలెక్ట్ చేసి బాక్సాఫీస్ రికార్డులను బద్దలు కొట్టింది.
ఈ సినిమాలోనే చిరంజీవి తొలిసారి గడ్డం పెంచి, కౌబాయ్ లుక్‌లో కనిపించి అభిమానులను మెప్పించారు. వాస్తవానికి, తెలుగులో కౌబాయ్ థీమ్ అసాధారణం కావడం వల్ల, మొదట చిరంజీవి దీన్ని ఒక సాహసంగా భావించినప్పటికీ, కథ నచ్చడంతో వెంటనే గ్రీన్ సిగ్నల్ ఇచ్చారట.
ఇది కూడా చదవండి: Saailu: నెగెటివ్ టాక్ వస్తే, అమీర్‌పేట్ సెంటర్‌లో అర్ధనగ్నంగా తిరుగుతా.. షాకింగ్ ఛాలెంజ్
చిరు పంచుకున్న మధుర జ్ఞాపకాలు
‘కొదమసింహం’ రీ-రిలీజ్ సందర్భంగా మెగాస్టార్ చిరంజీవి ఒక ప్రత్యేక వీడియో సందేశాన్ని పంచుకున్నారు. ఈ సందర్భంగా ఆయన పంచుకున్న జ్ఞాపకాలు మెగా అభిమానులకు మరింత కిక్ ఇచ్చాయి.సినిమాలో మోహన్‌బాబు పోషించిన ‘సుడిగాలి’ పాత్ర తన ఫేవరెట్ అని, ఆ పాత్రకు మోహన్‌బాబు తప్ప మరెవరూ న్యాయం చేయలేరని చిరంజీవి స్వయంగా ప్రశంసించారు.
లెజెండరీ బాలీవుడ్ నటుడు ప్రాణ్‌తో కలిసి పనిచేయడం తన అదృష్టమని, ఆ సన్నివేశాలు ఇప్పటికీ గుర్తుండిపోయాయని చిరంజీవి అన్నారు. చరణ్‌కు అన్నం పెట్టిన పాటలు: “కౌబాయ్ సినిమాలు నాకు ఇష్టమే, కానీ ఇలాంటిది చేస్తానని ఊహించలేదు. ముఖ్యంగా చరణ్ చిన్నప్పుడు భోజనం చేయాలంటే, వాళ్లమ్మ కచ్చితంగా ఈ సినిమా క్యాసెట్ పెట్టాల్సిందే. ‘కొదమసింహం’ పాటలు పెడితే తప్ప చరణ్ తినేవాడు కాదు” అంటూ తన కొడుకు రామ్ చరణ్‌తో ముడిపడిన ఒక ఆసక్తికర విషయాన్ని వెల్లడించారు.
రీ-రిలీజ్‌లు పాత అభిమానులకు నాస్టాల్జియాను పంచిస్తే, కొత్త తరానికి 90ల నాటి అసలైన మాస్ ఎంటర్‌టైన్‌మెంట్‌ను పరిచయం చేస్తాయని చిరంజీవి ఆశాభావం వ్యక్తం చేశారు. అందుకే, టికెట్ రేట్లు పెరిగినా థియేటర్ల దగ్గర హౌస్‌ఫుల్ బోర్డులు కనిపిస్తున్నాయి. ‘కొదమసింహం’ రీ-రిలీజ్… మెగా అభిమానులందరికీ మరోసారి పాత మాస్ మ్యాజిక్‌ను రుచి చూపించేందుకు వచ్చేసింది!