Punjab: పంజాబ్‌ రాష్ట్రంలోని హోషియార్‌పూర్ జిల్లాలో ఒక తీవ్రమైన రోడ్డు ప్రమాదం విషాదాన్ని నింపింది. దాసుహా-హాజీపూర్ రోడ్డు మార్గంలో ప్రయాణికులతో వెళ్తున్న ఒక ప్రైవేట్ బస్సు అదుపుతప్పి బోల్తా పడింది. ఈ దురదృష్టకర సంఘటనలో 10 మంది ప్రయాణికులు అక్కడికక్కడే మృతి చెందగా, మరో 24 మందికి పైగా తీవ్ర గాయాలయ్యాయి.
దాసుహా సమీపంలోని సగ్రా అడ్డా వద్ద ఈ ప్రమాదం చోటుచేసుకుంది. వేగంగా వెళ్తున్న బస్సు అకస్మాత్తుగా అదుపుతప్పి రోడ్డు పక్కన పడిపోయింది. ప్రమాదం జరిగిన వెంటనే స్థానికులు, అధికారులు సహాయక చర్యలు చేపట్టారు. సమాచారం అందుకున్న పోలీసులు వెంటనే ఘటనా స్థలానికి చేరుకున్నారు.
Also Read: Ponguleti srinivas: బీఆర్ఎస్ ప్రభుత్వం 8 లక్షల కోట్ల అప్పు చేసింది..
క్షతగాత్రులను సమీపంలోని ప్రభుత్వ, ప్రైవేట్ ఆసుపత్రులకు తరలించారు. వీరిలో కొందరి పరిస్థితి విషమంగా ఉన్నట్లు వైద్యులు తెలిపారు. దీంతో మృతుల సంఖ్య మరింత పెరిగే అవకాశం ఉందని ఆందోళన వ్యక్తమవుతోంది.
పోలీసులు ఈ ఘటనపై కేసు నమోదు చేసి దర్యాప్తు ప్రారంభించారు. బస్సు డ్రైవర్ నిర్లక్ష్యం లేదా మరేదైనా సాంకేతిక లోపం ప్రమాదానికి కారణమా అనే కోణంలో విచారణ జరుపుతున్నారు. ఈ సంఘటనతో ఆ ప్రాంతంలో విషాద ఛాయలు అలుముకున్నాయి. మృతుల కుటుంబ సభ్యులు, బంధువుల రోదనలతో ఆసుపత్రి ప్రాంగణం హృదయవిదారకంగా మారింది.