Nitish Kumar: బీహార్ రాజకీయాలు మరో కీలక ఘట్టానికి చేరుకున్నాయి. జనతాదళ్ (యునైటెడ్) అధినేత నితీశ్ కుమార్ మరోసారి, సరిగ్గా 10వ సారి, బీహార్ ముఖ్యమంత్రిగా ప్రమాణస్వీకారం చేసేందుకు రంగం సిద్ధమైంది. బీహార్‌లో నూతన ఎన్డీయే (NDA) కూటమి ప్రభుత్వం ఈ నెల 19 లేదా 20వ తేదీన కొలువుదీరనుంది. ఈ చారిత్రక ప్రమాణస్వీకార కార్యక్రమానికి ప్రధానమంత్రి నరేంద్ర మోదీ కూడా హాజరుకానున్నట్లు సమాచారం.
మంత్రివర్గ కూర్పుపై స్పష్టత
ప్రమాణస్వీకారానికి ముందే, ఎన్డీయే కూటమిలో మంత్రివర్గ కూర్పుపై స్పష్టత వచ్చినట్లు తెలుస్తోంది. ఇటీవల కేంద్ర హోంమంత్రి అమిత్ షాతో నితీశ్ కుమార్ జరిపిన సమావేశంలో దీనిపై తుది నిర్ణయం తీసుకున్నట్లు సమాచారం. ఈ మంత్రివర్గంలో బీజేపీకి సింహభాగం దక్కనుంది.
-
బీజేపీ (BJP): 15 నుంచి 16 మంత్రి పదవులు.
-
జేడీయూ (JDU): 14 మంత్రి పదవులు.
-
ఎల్జేపీ (LJP-చిరాగ్ పాశ్వాన్): 3 మంత్రి పదవులు.
-
హెచ్‌ఏఎం (HAM-జితన్ రామ్ మాంఝీ): 1 మంత్రి పదవి.
-
ఆర్‌ఎల్‌ఎం (RLM): 1 మంత్రి పదవి.
మొత్తం మంత్రి పదవుల్లో అత్యధిక వాటా బీజేపీకే లభించడం ఈ కొత్త కూటమిలో కమలం పార్టీ బలాన్ని సూచిస్తోంది.
నేటి నుంచే అసెంబ్లీ రద్దు ప్రక్రియ
బీహార్‌లో 18వ అసెంబ్లీ ఏర్పాటు ప్రక్రియ సోమవారం నుంచే ప్రారంభమైంది. నితీశ్ కుమార్ నేతృత్వంలోని ప్రస్తుత కేబినెట్ సమావేశమై, 17వ శాసనసభను రద్దు చేస్తూ తీర్మానం చేయనుంది. అనంతరం, నితీశ్ కుమార్ తన రాజీనామాను గవర్నర్‌కు సమర్పించనున్నారు.
ఇది కూడా చదవండి: Globe Trotter Event: వారణాసి ఈవెంట్ ఖర్చు తో మూడు చిన్న సినిమాలు తీయొచ్చు
ఆ తర్వాత, ఎన్డీయే శాసనసభాపక్ష సమావేశంలో నితీశ్ కుమార్‌ను తమ నేతగా అధికారికంగా ఎన్నుకుంటారు. ప్రధాని నరేంద్ర మోదీ షెడ్యూల్‌ను దృష్టిలో ఉంచుకుని, ప్రమాణస్వీకార తేదీని బుధవారం (19) లేదా గురువారం (20) నాడు అధికారికంగా ఖరారు చేయనున్నారు.
రికార్డుల ‘నితీశ్ కుమార్ ‘
నితీశ్ కుమార్ ఈ పదవీకాలంతో పదోసారి బీహార్ ముఖ్యమంత్రిగా బాధ్యతలు చేపట్టి, రికార్డు సృష్టించనున్నారు. తరచుగా మారుతున్న రాజకీయ సమీకరణాల మధ్య నితీశ్.. ముఖ్యమంత్రి పదవిలో కొనసాగుతూ, బీహార్ రాజకీయాల్లో తన స్థానాన్ని సుస్థిరం చేసుకుంటున్నారు. తాజాగా మళ్లీ బీజేపీతో చేతులు కలపడం ద్వారా, బీహార్ రాజకీయం మరోసారి ఎన్డీయే పరం కానుంది.