Bigg Boss 9: బిగ్‌బాస్ సీజన్ 9 షో రోజురోజుకూ రసవత్తరంగా మారుతోంది. ఇంటి సభ్యుల మధ్య గొడవలు, భావోద్వేగాలు, మాటల యుద్ధాలు తారస్థాయికి చేరుకున్నాయి. ప్రతీ వారం మాదిరిగానే, ఈ వారాంతంలో కూడా ఒక కంటెస్టెంట్ ఇంటి నుంచి బయటకు రానున్నారు. తాజా సమాచారం ప్రకారం, నాల్గవ వారంలో ఎలిమినేషన్ ప్రక్రియ పూర్తయింది.
హౌస్ నుంచి బయటకు హరీష్!
నాలుగో వారం ఎలిమినేషన్ విషయంలో ఆసక్తి నెలకొనగా, ఈసారి కామనర్ నుంచి హరిత హరీష్ ఇంటి నుంచి బయటకు వెళ్తున్నట్లు సమాచారం. ఈ వారం నామినేషన్స్‌లో సంజన గల్రానీ, ఫ్లోరా షైనీ, రీతూ చౌదరీ, హరిత హరీష్, శ్రీజ, దివ్య నిఖిత ఉన్నారు. అనధికారిక ఓటింగ్ ఫలితాల ప్రకారం, హరిత హరీష్, శ్రీజ దమ్ము అత్యల్ప ఓట్లను సాధించారు.
చివరికి, శ్రీజ కంటే హరీష్‌కే తక్కువ ఓట్లు పడటంతో, అతను ఎలిమినేట్ అయినట్లు తెలుస్తోంది. గత కొన్ని రోజులుగా హరీష్ సరిగా ఆడకుండా, అనారోగ్యం పేరుతో డల్‌గా ఉండటం, పలుమార్లు తాను ఎలిమినేట్ అయితే బాగుంటుందని పదే పదే చెప్పడం కూడా దీనికి ఒక కారణంగా భావిస్తున్నారు. హరీష్ బిగ్‌బాస్ ప్రయాణం నాలుగో వారంతో ముగిసింది.
హరీష్ రెమ్యునరేషన్ ఎంతంటే?
నాలుగు వారాల పాటు హౌస్‌లో ఉన్న హరిత హరీష్‌కు వారానికి దాదాపు రూ. 60 వేల వరకు పారితోషికం ఇచ్చినట్లు సమాచారం. అంటే, మొత్తంగా నాలుగు వారాలకు గాను హరీష్ రూ. 2,40,000 అందుకున్నట్లు తెలుస్తోంది. కామన్‌మ్యాన్‌గా వచ్చిన హరీష్, తన అభిప్రాయాలను కుండబద్దలు కొట్టినట్లు చెప్పి హౌస్‌లో వివాదాలకు కేంద్ర బిందువుగా మారాడు. అయితే, లౌక్యం ప్రదర్శించకపోవడం వల్ల సభ్యుల నుంచి వ్యతిరేకతను ఎదుర్కొన్నాడు.
Also Read: Rahul Ramakrishna: నేను చిన్న నటుడిని.. రాహుల్‌ రామకృష్ణ మరో ట్వీస్ట్‌
నాగార్జున క్లాస్: గోల్డ్, సిల్వర్, బ్లాక్ స్టార్స్
వారాంతంలో హోస్ట్ అక్కినేని నాగార్జున హౌస్‌మేట్స్‌కు గట్టిగానే క్లాస్ తీసుకున్నారు. కంటెస్టెంట్స్ ఆటతీరు ఆధారంగా వారికి గోల్డ్ (బంగారం), సిల్వర్ (వెండి), బ్లాక్ (నలుపు) స్టార్స్‌ను ఇచ్చారు.
గోల్డ్ స్టార్: నాగార్జున ఇమ్మానుయేల్‌కు గోల్డ్ స్టార్ ఇచ్చి, అతని ఆట తీరును మెచ్చుకున్నారు.
సిల్వర్ స్టార్: శ్రీజకు సిల్వర్ స్టార్ ఇచ్చి, మరింత మెరుగుపరుచుకోవాలని సూచించారు.
బూస్ట్: సుమన్ శెట్టిని మెచ్చుకున్న నాగ్, అతడు గోల్డ్ స్టార్‌కి దగ్గరగా ఉన్నాడని, తన బలం తెలుసుకోవాలని ప్రోత్సహించారు.
శనివారం నాటి ఎపిసోడ్‌లో నాగార్జున కంటెస్టెంట్స్‌ను మందలించడంతో, ఈ వారం ఆట మరింత రసవత్తరంగా మారింది. హరీష్ ఎలిమినేషన్ తర్వాత హౌస్‌లో ఎలాంటి మార్పులు వస్తాయో చూడాలి.