BCCI: భారత క్రికెట్ నియంత్రణ మండలి (BCCI) తన ఆర్థిక బలాన్ని గత ఐదేళ్లలో భారీగా పెంచుకుంది. ఇటీవల విడుదలైన నివేదిక ప్రకారం, బీసీసీఐ బ్యాంక్ బ్యాలెన్స్, గత ఐదేళ్లలో రూ. 14,627 కోట్లు పెరిగి, మొత్తం నగదు నిల్వలు రూ. 20,686 కోట్లకు చేరాయి. కేవలం 2023-24 ఆర్థిక సంవత్సరంలోనే ఈ పెరుగుదల రూ. 4,193 కోట్లుగా నమోదైంది. 2019లో రూ. 6,059 కోట్లుగా ఉన్న బీసీసీఐ నగదు, బ్యాంక్ బ్యాలెన్స్ ఇప్పుడు రూ. 20,686 కోట్లకు చేరింది. రాష్ట్ర క్రికెట్ సంఘాలకు చెల్లించాల్సిన అన్ని బకాయిలు చెల్లించిన తర్వాత కూడా ఈ మొత్తం నిల్వ ఉంది. జనరల్ ఫండ్ కూడా 2019లో రూ. 3,906 కోట్ల నుంచి 2024 నాటికి రూ. 7,988 కోట్లకు దాదాపు రెట్టింపైంది.
ఇది కూడా చదవండి: Shreyas Iyer: భారత్‌ ఎ కెప్టెన్‌గా శ్రేయాస్‌
ఐపీఎల్ ఆదాయం, ఐసీసీ నుంచి వచ్చే నిధులు, పెట్టుబడుల నుంచి వచ్చే రాబడి ఈ భారీ పెరుగుదలకు ప్రధాన కారణాలు. గత ఆర్థిక సంవత్సరంలో ఐపీఎల్ నుంచి వచ్చిన మిగులు ఆదాయం రూ. 1,623.08 కోట్లుగా ఉంది. ఆదాయం పెరగడంతో పాటు, బీసీసీఐ భారీగా పన్నులు కూడా చెల్లిస్తోంది. 2023-24 ఆర్థిక సంవత్సరానికి గాను పన్ను బాధ్యతల కోసం రూ. 3,150 కోట్లు కేటాయించింది. ఈ ఆర్థిక నివేదిక వివరాలను సెప్టెంబర్ 28న జరిగే వార్షిక సర్వసభ్య సమావేశం (AGM)లో అధికారికంగా ప్రవేశపెట్టనున్నారు. ఈ గణాంకాలు బీసీసీఐ ప్రపంచంలోనే అత్యంత ధనిక క్రికెట్ బోర్డుగా తన స్థానాన్ని మరింత పటిష్టం చేసుకున్నట్లు సూచిస్తున్నాయి.