Baahubali The Epic: భారతీయ చలనచిత్ర స్థాయిని ప్రపంచానికి చాటిన ‘బాహుబలి’ చిత్రం మరోసారి సంచలనం సృష్టిస్తోంది. దర్శకధీరుడు ఎస్.ఎస్. రాజమౌళి తెరకెక్కించిన ఈ విజువల్ వండర్, రెండు భాగాలను కలిపి ‘బాహుబలి ది ఎపిక్’ పేరుతో ఇటీవల థియేటర్లలోకి తిరిగి వచ్చింది. విడుదలైన పదేళ్ల తర్వాత కూడా, ఈ సినిమా ప్రేక్షకుల ఆదరణ ఏమాత్రం తగ్గలేదని నిరూపించింది.
రీ-రిలీజ్‌లోనూ కలెక్షన్ల సునామీ
సాధారణంగా పాత సినిమాలు రీ-రిలీజ్ అయినప్పుడు అభిమానులు మాత్రమే చూస్తుంటారు. కానీ ‘బాహుబలి’ విషయంలో మాత్రం పరిస్థితి వేరు. అక్టోబర్ 31న ‘బాహుబలి ది ఎపిక్’ విడుదల కాగా, తొలి రోజు నుంచే థియేటర్ల వద్ద భారీ సందడి కనిపించింది. అనేక ప్రాంతాల్లో మార్నింగ్ షోలకే టికెట్లు హౌస్ ఫుల్ కావడం ఈ సినిమా క్రేజ్‌కు నిదర్శనం.
ట్రేడ్ వర్గాల సమాచారం ప్రకారం, ‘బాహుబలి ది ఎపిక్’ మొదటి రోజు ఏకంగా రూ. 10.4 కోట్లు నెట్ కలెక్షన్లు, రూ. 18 కోట్లు గ్రాస్ కలెక్షన్లు వసూలు చేసింది. ఇండియన్ సినీ చరిత్రలో రీ-రిలీజ్ అయిన సినిమాల్లో ఈ స్థాయిలో వసూళ్లు సాధించడం ఇదే మొదటిసారి కావడం విశేషం. ఈ అసాధారణ విజయం హీరో ప్రభాస్ మరియు దర్శకుడు రాజమౌళి ప్రతిభకు, భారతీయ సినిమా పట్ల ప్రేక్షకుల మమకారానికి స్పష్టమైన నిదర్శనంగా నిలుస్తోంది.
Also Read: Andhra King Taluka: మెస్మరైజింగ్ మెలోడీగా ఆకట్టుకుంటున్న చిన్ని గుండెలో!
పాత రికార్డులన్నీ బద్దలు!
గతంలో రీ-రిలీజ్ అయిన చిత్రాల మొదటి రోజు కలెక్షన్ల రికార్డులను ‘బాహుబలి ది ఎపిక్’ బద్దలు కొట్టింది. ఇంతకుముందు దళపతి విజయ్ నటించిన ‘గిల్’ సినిమా రీ-రిలీజ్‌లో రూ. 10 కోట్లు గ్రాస్ వసూలు చేసి అగ్రస్థానంలో ఉండేది.
అలాగే, ఇతర స్టార్ హీరోల చిత్రాలైన:
పవన్ కళ్యాణ్ ‘గబ్బర్ సింగ్’ (రూ. 8 కోట్లు)
మహేష్ బాబు ‘బిజినెస్‌మెన్’ (రూ. 5.27 కోట్లు)
మహేష్ బాబు ‘మురారి’ (రూ. 5 కోట్లు)
…వంటి సినిమాల రికార్డులను సైతం ‘బాహుబలి ది ఎపిక్’ తొలి రోజులోనే అధిగమించింది.
భారతీయ సినిమాకు చిరస్మరణీయ చిత్రం
ప్రభాస్, రానా, అనుష్క శెట్టి, తమన్నా వంటి తారాగణం నటించిన ఈ సినిమా మొదటి భాగం ‘బాహుబలి: ది బిగినింగ్’ (2015) మరియు రెండో భాగం ‘బాహుబలి: ది కన్‌క్లూజన్’ (2017) ప్రపంచవ్యాప్తంగా కలెక్షన్ల తుఫాను సృష్టించాయి. రెండో భాగం సుమారు రూ. 1800 కోట్ల పైగా గ్రాస్ కలెక్షన్లు వసూలు చేసి, అత్యధిక వసూళ్లు సాధించిన భారతీయ చిత్రాలలో ఒకటిగా నిలిచింది. పదేళ్లు గడిచినా, రీ-రిలీజ్‌లోనూ అదే క్రేజ్‌ను కొనసాగిస్తూ, ‘బాహుబలి’ భారతీయ చలనచిత్ర చరిత్రలో తన స్థానాన్ని మరింత పటిష్టం చేసుకుంది.