AP Government: ఆంధ్రప్రదేశ్ ప్రభుత్వం రాష్ట్రంలో భిక్షాటనను పూర్తిగా నిషేధిస్తూ చారిత్రాత్మక నిర్ణయం తీసుకుంది. ఈ మేరకు తీసుకొచ్చిన ‘భిక్షాటన నివారణ (సవరణ) చట్టం-2025’ అధికారికంగా అమల్లోకి వచ్చింది. కేవలం నిషేధాజ్ఞలే కాకుండా, ప్రభుత్వం 1977 నాటి చట్టంలో మానవీయ కోణంలో కీలక పదజాల మార్పులు కూడా చేసింది.
ఈ చట్టానికి గవర్నర్ ఈ నెల 15వ తేదీన ఆమోదం తెలపగా, 27వ తేదీన ఆంధ్రప్రదేశ్ గెజిట్‌లో అధికారికంగా ప్రచురితమైంది (జీవో ఎంఎస్ నం.58). దీంతో రాష్ట్రవ్యాప్తంగా భిక్షాటన చేయడం చట్టరీత్యా నేరంగా పరిగణించబడుతుంది.
భిక్షాటనపై సంపూర్ణ నిషేధం, మాఫియాకు చెక్
భిక్షాటనను నిషేధించడానికి ప్రభుత్వం వెనుక ఉన్న ప్రధాన ఉద్దేశాలు.. ఆంధ్ర ప్రదేశ్ రాష్ట్రంలో భిక్షాటన అనేది ఒక వ్యవస్థీకృత మాఫియాగా మారిందని, కొందరు నిరుపేదలను అడ్డుపెట్టుకుని దోపిడీ చేస్తున్నారని ప్రభుత్వం గుర్తించింది. ఈ పరిస్థితిని పూర్తిగా అరికట్టాలని లక్ష్యంగా పెట్టుకుంది.
ఇది కూడా చదవండి: Kabaddi Player: కబడ్డీ ప్లేయర్‌ దారుణ హత్య..పాత కక్షలే కారణం..?
భిక్షాటనపై ఆధారపడే నిరుపేదలు, నిస్సహాయులకు సరైన పునరావాసం కల్పించి, వారికి ప్రత్యామ్నాయ మార్గాలను చూపి, సమాజంలో గౌరవంగా జీవించేలా చేయడమే ఈ చట్టం ప్రధాన లక్ష్యం. కొత్త చట్టం అమలు బాధ్యతను సంక్షేమ శాఖ మరియు పోలీసు శాఖలు సంయుక్తంగా పర్యవేక్షిస్తాయి.
చట్టంలో ‘గౌరవప్రదమైన’ పదాల సవరణ
భిక్షాటన నిషేధ చట్టం (1977) లోని అభ్యంతరకర పదజాలాన్ని తొలగించడం ద్వారా ఆంధ్రప్రదేశ్ ప్రభుత్వం మానవీయ విలువలకు పట్టం కట్టింది. జాతీయ మానవ హక్కుల కమిషన్ (NHRC) సూచనల మేరకు ఈ మార్పులు చేశారు. చట్టంలో ఉన్న ‘లెప్పర్’ మరియు ‘ల్యూనాటిక్’ అనే పదాలు కుష్టు వ్యాధిగ్రస్తులు మరియు మానసిక సమస్యలు ఉన్నవారిని కించపరిచేలా ఉన్నాయని కమిషన్ గుర్తించింది.
| తొలగించిన పదం (గతంలో) | కొత్తగా చేర్చిన పదం (ప్రస్తుతం) |
| లెప్పర్ (Leper) | కుష్టు వ్యాధి సోకిన వ్యక్తి |
| ల్యూనాటిక్ (Lunatic) | మానసిక వ్యాధిగ్రస్థుడు |
శాసనసభ, మండలిలో ఏకగ్రీవంగా ఆమోదం పొందిన ఈ సవరణలకు గవర్నర్ ఆమోదం తెలపడంతో న్యాయ శాఖ కార్యదర్శి గొట్టాపు ప్రతిభా దేవి సంతకంతో ఉత్తర్వులు జారీ అయ్యాయి. ఈ మార్పుల ద్వారా భిక్షాటన చేసేవారి పట్ల సమాజంలో మరింత గౌరవం పెరుగుతుందని ప్రభుత్వం ఆశిస్తోంది.