Amit Shah: బీహార్‌లో అసెంబ్లీ ఎన్నికల వేడి తారాస్థాయికి చేరుకున్న నేపథ్యంలో, రాష్ట్రంలో ఎన్డీయే కూటమి ముఖ్యమంత్రి అభ్యర్థి ఎవరు అనే విషయంపై నెలకొన్న సందిగ్ధత, ఊహాగానాలపై కేంద్ర హోంమంత్రి అమిత్ షా స్పందించారు. బీహార్ రాజకీయాల్లో కీలక మలుపుగా పరిగణిస్తున్న ఈ అంశంపై, ఆయన ఒక జాతీయ ఛానల్‌కు ఇచ్చిన ఇంటర్వ్యూలో కీలక వ్యాఖ్యలు చేశారు. ఎన్డీయే కూటమిలో భాగస్వామ్య పక్షాలైన బీజేపీ, జేడీయూల మధ్య ముఖ్యమంత్రి పదవి విషయంలో విభేదాలు ఉన్నాయనే ప్రచారాన్ని అమిత్ షా గట్టిగా తోసిపుచ్చారు. “మీడియా మరియు సోషల్ మీడియాలో జరుగుతున్న ఈ ప్రచారాలన్నీ పనికిమాలినవి. బీహార్ ఎన్డీయే కూటమిలో పార్టీల మధ్య ఎలాంటి మనస్పర్థలు లేవు” అని ఆయన స్పష్టం చేశారు.
ప్రస్తుత సీఎం, జేడీయూ చీఫ్ అయిన నితీష్ కుమార్ నాయకత్వంపై అమిత్ షా చేసిన వ్యాఖ్యలు రాజకీయ పరిశీలకుల్లో మరింత ఆసక్తిని పెంచాయి.ప్రస్తుతానికి మేము ముఖ్యమంత్రి నితీశ్ కుమార్ గారి సారథ్యంలోనే ఎన్నికలకు వెళ్తున్నాం అని అమిత్ షా స్పష్టంగా చెప్పారు. అయితే, “నితీశ్ కుమార్ మళ్లీ సీఎం అవుతారా? కాదా? అనేది నేను ఒక్కడినే నిర్ణయించే అంశం కాదు. అంత తొందర ఎందుకని?” అంటూ ఆసక్తికర వ్యాఖ్యలు చేశారు. “ఎన్నికలు పూర్తయిన తర్వాత, మా మిత్రపక్షాలన్నీ కలిసి కూర్చుని అప్పుడు సీఎం ఎవరు అనేది నిర్ణయిస్తాయి” అని షా తేల్చిచెప్పారు. 2020 అసెంబ్లీ ఎన్నికల్లో జేడీయూ కంటే బీజేపీ అత్యధిక స్థానాలు గెలుచుకున్నప్పటికీ, నితీశ్ కుమార్‌ను ముఖ్యమంత్రిగా ఎందుకు చేశారనే ప్రశ్నకూ అమిత్ షా సమాధానం ఇచ్చారు.”నితీశ్ కుమార్ గారు స్వయంగా ప్రధాని మోదీని కలిసి, బీజేపీ నుంచే ముఖ్యమంత్రి ఉండడం సబబని అన్నారు.
Also Read: EC: రాజకీయ ప్రకటనలపై ఈసీ కీలక ఆదేశాలు
అయినప్పటికీ, మా మిత్రపక్షానికి మేము ఎప్పుడూ గౌరవం ఇస్తాం. సీనియారిటీని పరిగణనలోకి తీసుకుని ఆయన్నే సీఎం చేశాం,” అని అమిత్ షా వివరించారు. ఈ వ్యాఖ్యల ద్వారా బీజేపీ మిత్రపక్షాలకు ఇచ్చే గౌరవాన్ని ప్రస్తావించడంతో పాటు, భవిష్యత్ నిర్ణయాల్లో బీజేపీ బలం మరియు సీనియారిటీ కూడా ప్రధాన పాత్ర పోషిస్తాయనే సంకేతాలు పంపినట్లు విశ్లేషకులు భావిస్తున్నారు. నితీశ్ కుమార్ ఆరోగ్యం, బహిరంగ ప్రదేశాల్లో ఆయన ప్రవర్తనపై ప్రతిపక్షాలు చేస్తున్న విమర్శలపైనా అమిత్ షా స్పందించారు. “వయసు కారణంగా చిన్న చిన్న సమస్యలు ఉండవచ్చు. కానీ, ముఖాముఖిగా, ఫోన్ ద్వారానూ నితీశ్ సుదీర్ఘంగా, అనర్గళంగా మాట్లాడగలుగుతున్నారు. సీఎంగా ఆయన సమర్థవంతమైన పాలన అందిస్తున్నారు,” అని షా సమర్థించారు. ఈ ఎన్నికల్లో ఎన్డీయే కూటమి మునుపెన్నడూ చూడని ఘన విజయం సాధిస్తుందని, నవంబర్ 14న వెల్లడయ్యే ఫలితాలతో గత రికార్డులన్నింటినీ బద్దలు కొడతామని అమిత్ షా ధీమా వ్యక్తం చేశారు. మొత్తం మీద, సీఎం అభ్యర్థి విషయంలో ప్రస్తుతానికి నితీశ్ నాయకత్వమే అయినప్పటికీ, ఎన్నికల ఫలితాల తర్వాత అంతిమ నిర్ణయం మిత్రపక్షాల సమష్టిగా తీసుకుంటాయంటూ అమిత్ షా వ్యాఖ్యానించడం బీహార్ ఎన్నికల రాజకీయాల్లో మరింత ఉత్కంఠను పెంచింది.