Bandi Sanjay: బీజేపీ జాతీయ ప్రధాన కార్యదర్శి మరియు కేంద్ర హోంశాఖ సహాయ మంత్రి బండి సంజయ్ కుమార్ దీపావళి పండుగ సందర్భంగా పాతబస్తీలోని ప్రసిద్ధ భాగ్యలక్ష్మీ అమ్మవారి ఆలయాన్ని దర్శించుకున్నారు. ఈ సందర్భంగా ఆయన మాట్లాడుతూ, గతంలో తమను హేళన చేసిన బీఆర్ఎస్, కాంగ్రెస్ నాయకులు సైతం ఇప్పుడు అమ్మవారి శక్తిని తెలుసుకుని దర్శించుకోవడం సంతోషంగా ఉందన్నారు.
అమ్మవారి ఆశీర్వాదంతోనే విజయ పరంపర
భాగ్యలక్ష్మీ అమ్మవారి శక్తిని ప్రపంచానికి చాటిచెప్పే అవకాశం తనకు దక్కడం అదృష్టంగా భావిస్తున్నానని బండి సంజయ్ తెలిపారు. తాను బీజేపీ రాష్ట్ర అధ్యక్షుడిగా ఉన్నప్పుడు అమ్మవారి పాదాల సాక్షిగా ప్రారంభించిన ప్రజా సంగ్రామ యాత్ర విజయవంతమైందని, ఎన్ని అడ్డంకులు వచ్చినా పాదయాత్రను పూర్తి చేశానని గుర్తు చేసుకున్నారు.
అమ్మవారి దయ వల్లే జీహెచ్ఎంసీ ఎన్నికల్లో బీజేపీ కేవలం 4 స్థానాల నుండి 48 స్థానాలకు చేరుకుందని, దుబ్బాక, హుజూరాబాద్ ఉప ఎన్నికల్లో కూడా విజయం సాధించిందని ఆయన పేర్కొన్నారు. ప్రస్తుతం పార్లమెంట్ ఎన్నికల్లో 8 స్థానాలు గెలుచుకోవడం ద్వారా ఈ విజయ పరంపరను కొనసాగిస్తున్నామని అన్నారు.
భాగ్యలక్ష్మీ ఆలయాన్ని స్వర్ణ దేవాలయంగా మారుస్తాం
గతంలో భాగ్యలక్ష్మీ అమ్మవారు లేరంటూ కాంగ్రెస్, బీఆర్ఎస్ నాయకులు హేళన చేశారని, ఇప్పుడు వారే ఆలస్యంగానైనా అమ్మవారి శక్తిని తెలుసుకున్నందుకు అభినందించారు. కేంద్ర హోంమంత్రి అమిత్ షా, రాజ్‌నాథ్ సింగ్, జేపీ నడ్డా వంటి ఎంతో మంది ప్రముఖులు అమ్మవారిని దర్శించుకున్నారని గుర్తు చేశారు.
బీజేపీ అధికారంలోకి వస్తే పాతబస్తీలోని భాగ్యలక్ష్మీ అమ్మవారి ఆలయాన్ని గోల్డెన్ టెంపుల్‌గా (స్వర్ణ దేవాలయంగా) మారుస్తామని ఆయన మరోసారి స్పష్టం చేశారు. రాబోయే రోజుల్లో దేశంలో మోదీ రాజ్యమే వస్తుందని ధీమా వ్యక్తం చేశారు.
ఆర్ఎస్ఎస్ ను అడ్డుకోవడం ఎవరి తరం కాదు!
కర్ణాటకలో ఆర్ఎస్ఎస్ ‘పథ సంచలన్’లో పాల్గొన్నందుకు ఒక ప్రభుత్వ అధికారిని సస్పెండ్ చేయడంపై బండి సంజయ్ తీవ్రంగా స్పందించారు. ఈ చర్యను దుర్మార్గంగా ఖండించారు. ఆర్ఎస్ఎస్ (RSS) అనేది రాజకీయ పార్టీ కాదని, అది సాంస్కృతిక, జాతీయవాద సంస్థ అని తెలిపారు. ఆర్ఎస్ఎస్ గొప్పతనాన్ని నాటి ప్రధాని ఇందిరా గాంధీ కూడా గుర్తించారని, కర్ణాటక ఉప ముఖ్యమంత్రి శివకుమార్ సైతం అసెంబ్లీలో ఆర్ఎస్ఎస్ గీతం పాడారని ఆయన గుర్తు చేశారు.
“చేతిని అడ్డం పెట్టి సూర్యుడిని ఆపలేనంత నిజమో, నిషేధం పేరుతో ఆర్ఎస్ఎస్ ను ఆపలేరనేది కూడా అంతే నిజం” అని బండి సంజయ్ గట్టిగా చెప్పారు.
ప్రస్తుత కర్ణాటక కాంగ్రెస్ ప్రభుత్వం ఇంకో రెండేళ్లే ఉంటుందని, రెండేళ్ల తర్వాత మళ్లీ బీజేపీ ప్రభుత్వం అధికారంలోకి వస్తుందని ధీమా వ్యక్తం చేశారు. బీజేపీ అధికారంలోకి రాగానే సస్పెండ్ అయిన ఆ అధికారికి రెండేళ్ల జీతభత్యాలన్నీ ఇవ్వడంతో పాటు ప్రమోషన్ కూడా ఇస్తామని స్పష్టం చేశారు. ఈలోగా ఆ అధికారి ఆర్ఎస్ఎస్ ద్వారా దేశ సేవ చేయాలని ఆయన కోరారు.
బండి సంజయ్‌తో పాటు బీజేపీ రాష్ట్ర నాయకులు గంగిడి మనోహర్ రెడ్డి, కాసం వెంకటేశ్వర్లు తదితరులు అమ్మవారిని దర్శించుకున్నారు. ఆలయ నిర్వాహకులు వారికి ప్రత్యేక ఆశీర్వచనం అందించారు.