Budda venkanna: రాజకీయ వాతావరణం మరోసారి వేడెక్కింది. వైసీపీ మాజీ మంత్రి జోగి రమేశ్ పై టీడీపీ మాజీ ఎమ్మెల్సీ బుద్ధా వెంకన్న సంచలన ఆరోపణలు చేశారు. ఇటీవల రాష్ట్రవ్యాప్తంగా కలకలం రేపిన కల్తీ మద్యం కేసులో ప్రధాన సూత్రధారి జోగి రమేశ్ అని, ఈ కేసులో అతడి అరెస్ట్ ఖాయం అని వెంకన్న వ్యాఖ్యానించారు.
శనివారం సాయంత్రం ఒక ప్రముఖ టీవీ చానల్ చర్చా కార్యక్రమంలో బుద్ధా వెంకన్న ఇలా చెప్పారు:
“కల్తీ మద్యం తయారీ వెనుక జోగి రమేశ్ ఉన్నారు. అతని ఆదేశాల ప్రకారమే ఇది జరిగిందని నిందితుడు జనార్ధన్‌రావు ఇప్పటికే విచారణలో అంగీకరించాడు. సాక్ష్యాధారాలు స్పష్టంగా ఉన్నందున, జోగి రమేశ్‌ను అరెస్ట్ చేయడం ఖాయం.”
అతను జోగి రమేశ్ రాజకీయంగా ప్రజలను తప్పుదోవ పట్టించేందుకు అసత్యాలు ప్రచారం చేస్తున్నారని విమర్శించారు. “అతడి రాజకీయ జీవితం మొత్తం అక్రమాలతో నిండిపోయింది” అని బుద్ధా వెంకన్న పేర్కొన్నారు.
ఇక ఆర్థిక అక్రమాలపై కూడా వెంకన్న తీవ్ర వ్యాఖ్యలు చేశారు. “వందల కోట్ల రూపాయల ఆస్తులు జోగి రమేశ్ ఎలా సంపాదించారు? అగ్రిగోల్డ్ బాధితులను బెదిరించి వారి ఆస్తులను బలవంతంగా రాయించుకున్నారు. ప్రజల సొమ్మును దోచిన వారిని వదిలే ప్రసక్తే లేదు” అని తెలిపారు.
గతంలో చంద్రబాబు నివాసం వద్ద జరిగిన నిరసనపై కూడా ఆయన స్పందించారు. “ప్రశాంతంగా నిరసన తెలిపే వారు రాళ్లు పట్టుకుని వెళ్ళడం దాడికాదా? ఇదే తరహా చర్యలు మాకు చేయాలా?” అని ప్రశ్నించారు.
బుద్ధా వెంకన్న పేర్కొన్న ఈ ఆరోపణలు, ప్రత్యారోపణలతో రాష్ట్ర రాజకీయ వాతావరణం మరింత తీవ్రంగా మారింది.