BCCI: ఆసియా కప్ ఫైనల్‌లో పాకిస్థాన్‌పై అద్భుత విజయం సాధించిన భారత క్రికెట్ జట్టుకు (టీమ్ ఇండియా) ట్రోఫీని అందజేయడంలో జరిగిన వివాదం ఇప్పుడు మరింత ముదురుతోంది. ఆసియా క్రికెట్ కౌన్సిల్ (ఏసీసీ) అధ్యక్షుడు, పాకిస్థాన్ క్రికెట్ బోర్డు (పీసీబీ) ఛైర్మన్ మోసిన్ నఖ్వీ వైఖరిపై భారత క్రికెట్ నియంత్రణ మండలి (బీసీసీఐ) తీవ్ర ఆగ్రహం వ్యక్తం చేస్తోంది.
ట్రోఫీ ఇవ్వకుండా మొండిపట్టు
ఆసియా కప్ ఫైనల్ గెలిచిన వెంటనే, నఖ్వీ చేతుల మీదుగా ట్రోఫీని అందుకోవడానికి భారత జట్టు నిరాకరించింది. దీనితో నఖ్వీ మొండిపట్టు పట్టి, ట్రోఫీని ఏసీసీ కార్యాలయంలోనే ఉంచాలని ఆదేశాలు జారీ చేశారు. తన అనుమతి లేకుండా ఎవరికీ ఇవ్వకూడదని, తాను స్వయంగా వచ్చి భారత కెప్టెన్‌కు లేదా బీసీసీఐ ప్రతినిధులకు మాత్రమే అప్పగిస్తానని ఆయన పట్టుబడుతున్నారు.
‘ఆసియా కప్ నఖ్వీ వ్యక్తిగత సొత్తు కాదు’ అని బీసీసీఐ కార్యదర్శి దేవజిత్ సైకియా గట్టిగా కౌంటర్ ఇచ్చారు. ఈ టోర్నీకి పాకిస్థాన్ అధికారిక ఆతిథ్యం ఇచ్చింది కాబట్టి, విజేతగా నిలిచిన భారత్‌కు ట్రోఫీని తక్షణమే అప్పగించాలని బీసీసీఐ స్పష్టం చేస్తోంది. అయినప్పటికీ, నఖ్వీ మొండి వైఖరిని కొనసాగిస్తూ, ట్రోఫీని తనవద్దే ఉంచుకోవడం వివాదంగా మారింది.
Also Read: IND vs WI: భారత్ తొలి ఇన్నింగ్స్ 518/5 డిక్లేర్, గిల్, జైస్వాల్ భారీ సెంచరీలు!
నఖ్వీపై బీసీసీఐ మాస్టర్ ప్లాన్
నఖ్వీ వివాదాస్పద వైఖరిపై బీసీసీఐ తీవ్రంగా స్పందించాలని నిర్ణయించుకున్నట్లు తెలుస్తోంది. విశ్వసనీయ వర్గాల సమాచారం ప్రకారం (పీటీఐ నివేదిక), నఖ్వీపై కఠిన చర్యలు తీసుకునేందుకు బీసీసీఐ సిద్ధమవుతోంది. ముఖ్యంగా, అతడిని అంతర్జాతీయ క్రికెట్ మండలి (ఐసీసీ) బోర్డు ఆఫ్ డైరెక్టర్ పదవి నుంచి తొలగించేలా బీసీసీఐ మాస్టర్ ప్లాన్ సిద్ధం చేస్తున్నట్లు వార్తలు వస్తున్నాయి.
నఖ్వీ తీరు ఇలాగే కొనసాగితే, భవిష్యత్తులో కఠిన చర్యలకు ఉపక్రమించే అవకాశం ఉందని క్రికెట్ వర్గాలు హెచ్చరిస్తున్నాయి. నఖ్వీ రాజకీయపరమైన ప్రకటనలు చేయడం కూడా అభిమానుల ఆగ్రహానికి కారణమైంది. ఈ వివాదం క్రికెట్ ప్రపంచంలో చర్చనీయాంశంగా మారింది.